سرجیو گور بھارت میں نئے امریکی سفیر نامزد

واشنگٹن (اُردو پوائنٹ اخبارتازہ ترین - این این آئی۔ 23 اگست2025ء)امریکا کے صدر ڈونلڈ ٹرمپ نے سرجیو گور کو بھارت میں نیا امریکی سفیر نامزد کردیا، انہیں جنوب اور وسط ایشیائی امور کیلئے خصوصی مندوب بھی مقرر کیا گیا ہے۔گور اس وقت وائٹ ہاوس میں صدارتی پرسنل آفس کے ڈائریکٹر کی حیثیت سے خدمات انجام دے رہے ہیں۔ امریکا کے صدر ڈونلڈ ٹرمپ کا کہنا تھا کہ گور نئے عہدے کیلئے سینیٹ سے توثیق تک اپنے فرائض انجام دیتے رہیں گے۔

صدر ٹرمپ نے کہا کہ سرجیو ان کے قریبی دوست ہیں جو کئی برسوں سے انکے ساتھ ہیں، انہوں نے صدارتی مہم میں بھی ساتھ دیا، کتاب کی اشاعت میں بھی کردار ادا کیا۔بطور ڈائریکٹر سرجیو اور انکی ٹیم نے ہر وفاقی شعبے میں انتہائی کم وقت میں چار ہزار امریکا فرسٹ پیٹریاٹس کو ملازمت دی تھی جس کے سبب مختلف محکموں اور ایجنسییوں میں 95 فیصد سے زائد ملازمتیں مکمل ہوگئی ہیں۔

(جاری ہے)

سرجیو گور کی نامزدگی ایسے وقت کی گئی ہے جب امریکا بھارت تعلقات صدر ٹرمپ کی جانب سے نئی دہلی پر عائد نئے ٹیرف کے سبب کشیدہ ہیں۔ دنیا کی پانچویں بڑی معیشت ہونے کے دعویدار بھارت اور امریکا کے درمیان تجارتی امور پر بات چیت نئی دہلی کی جانب سے زرعی اور ڈیری سیکٹرز امریکا کیلئے نہ کھولنے کے سبب ناکام ہوگئی تھی۔ صدر ٹرمپ نے ابتدا میں بھارتی مصنوعات کی درآمد پر پچیس فیصد ٹیرف عائد کیا تھا تاہم خبردار کیا تھا کہ ستائس اگست سے یہ ٹیرف پچاس فیصد کردیا جائے گا کیونکہ بھارتی حکومت روس سے تیل خرید کر اسے یوکرین جنگ میں مضبوط بنارہا ہے۔

بھارت اور امریکا کے درمیان تجارتی حجم بھی قابل ذکر ہے، یہ حجم ایک سو نوے ارب ڈالر ہے۔ صدر ٹرمپ نے کہا کہ یہ بات بہت اہم ہے کہ آبادی کے لحاظ سے دنیا کے سب سے بڑے خطے میں ایک ایسا شخص موجود ہو جس پر وہ پورا اعتماد کرسکتے ہوں تاکہ وہ مدد کرے، ایجنڈے کی تکیمل کرے اور امریکا کو پھر سے عظیم بنایا جاسکے۔38 برس کے گور نے یہ بات یقینی بنائی تھی کہ ایسے کسی بھی شخص کو ٹرمپ انتظامیہ میں ملازمت نہ دی جائے جو ماضی میں صدر ٹرمپ کے خلاف موقف کا حامل رہا ہو، بعض صورتوں میں انہوں نے ملازمت کے خواہش مند افراد کی سوشل میڈیا پوسٹ بھی چیک کرائی تھیں۔

ٹیسلا کے مالک اور صدر ٹرمپ کے سابق خصوصی مشیر ایلون مسک نے سرجیو گورکو سانپ سے تشبیہ دی تھی اور الزام عائد کیا تھا کہ گور نے صدر ٹرمپ کو قائل کرلیا تھا کہ مسک کے بااعتماد شخص کو ناسا کا ایڈمنسٹریٹر مقرر نہ کریں۔