کراچی سے بھارتی خفیہ ایجنسی ’را‘ کا نیٹ ورک پکڑا گیا، سیف ہاؤسز کی موجودگی کا انکشاف

سی ٹی ڈی نے 8 جولائی کو گرفتار کیے گئے 4 بھارتی ایجنٹس کی دہشتگردی کی کارروائیوں کی سازش بے نقاب کردی

ساجد علی ہفتہ 23 اگست 2025 13:01

کراچی سے بھارتی خفیہ ایجنسی ’را‘ کا نیٹ ورک پکڑا گیا، سیف ہاؤسز کی ..

کراچی ( اُردو پوائنٹ اخبارتازہ ترین۔ 23 اگست 2025ء ) صوبہ سندھ کے داارلحکومت کراچی سے بھارتی خفیہ ایجنسی ’را‘ کا نیٹ ورک پکڑا گیا، جس کے شہر قائد میں سیف ہاؤسز کی موجودگی کا بھی انکشاف ہوگیا، حکام کا کہنا ہے کہ را نے دہشت گردی اور ٹارگٹ کلنگ کے لیے کراچی میں اپنا نیٹ ورک بنا رکھا تھا، ایجنٹوں کو ٹارگٹ کلنگ کی کارروائیوں کے لیے خطیر رقم فراہم کی گئی، کراچی میں دہشت گردوں کے سیف ہاؤسز بھی موجود تھے۔

ایڈیشنل آئی جی سی ٹی ڈی آزاد خان نے پریس کانفرنس میں بتایا کہ رواں برس 18 مئی کو سندھ کے علاقہ ماتلی میں ایک شہری کا قتل ہوا جو علاقے میں فلاحی کاموں کے حوالے سے مشہور تھا، قتل کی اس واردات کی سی سی ٹی وی فوٹیج میں 3 ملزمان کو دیکھا گیا، عینی گواہوں نے بھی ان ملزمان کو دیکھا، قتل کے الزام میں دو ملزمان کو گرفتار کرکے ان کے قبضے سے واردات میں استعمال ہونے والے پستول اور موٹر سائیکل برآمد کیے گئے۔

(جاری ہے)

انہوں نے مزید بتایا کہ تفتیش میں انکشاف ہوا قتل کی منصوبہ بندی سنجے نامی بھارتی ایجنٹ نے کی، حملے کا ماسٹر مائنڈ سنجے سنجیو کمار عرف فوجی ایک خلیجی ریاست میں رہائش پذیر ہے، را کے ایجنٹ نے شیخوپورہ کے رہائشی سلمان ورک کو ہائر کیا جس نے محمد عمیر ورک نامی شہری سے رابطہ کیا جو اس پوری واردات کا کمانڈر تھا اور عمیر نے شکیل احمد، محمد سجاد اور محمد عبید نامی شہریوں کے ذریعے رقم تقسیم کی۔

ایڈیشنل آئی جی سی ٹی ڈی کا کہنا ہے کہ دوران تفتیش یہ بات بھی سامنے آئی کہ محمد ارسلان ولد حبیب احمد نامی پاکستانی شہری بھارتی ایجنٹ سنجے کمار سے خلیجی ریاست میں ملا اور ارسلان نے ہی قتل کے لیے ہٹ ٹیم کو تمام معاشی اور لوجسٹک سپورٹ فراہم کی، را نے اس واردات کے لیے خطیر رقم خرچ کی اور سنجے نے اس قتل کو بیرون ملک سے ہینڈل کیا، اس قتل پر بھارتی میڈیا کی جانب سے جشن بھی منایا گیا۔