پاکستان کی علاقائی سالمیت اور قومی سلامتی کی حمایت جاری رکھیں گے. چین

چین ہمیشہ سے پاکستان کا سب سے قابل اعتماد شراکت دار اورمضبوط حامی رہا ہے، علاقائی امن و استحکام کےلئے پاک چین مضبوط دوستی ناگزیر ہے.ترجمان چینی وزارت خارجہ کا بیان

میاں محمد ندیم ہفتہ 23 اگست 2025 15:18

پاکستان کی علاقائی سالمیت اور قومی سلامتی کی حمایت جاری رکھیں گے. چین

بیجنگ(اردوپوائنٹ اخبارتازہ ترین-انٹرنیشنل پریس ایجنسی۔23 اگست ۔2025 ) چینی وزارت خارجہ نے کہا ہے کہ چین ہمیشہ سے پاکستان کا سب سے قابل اعتماد شراکت دار اورمضبوط حامی رہا ہے، پاکستان کی علاقائی سالمیت اور قومی سلامتی کی حمایت جاری رکھیں گے چین کی وزرات خارجہ کے ترجمان لین جیان نے کہا ہے کہ چین اورپاکستان کے درمیان روایتی دوستی غیرمتزلزل اور اٹوٹ ہے، عالمی منظرنامہ کیسا بھی ہو چین اورپاکستان کی دوستی کو کوئی فرق نہیں پڑتا، چینی وزیر خارجہ نے پاکستانی وزیراعظم شہباز شریف سے ملاقات کی ہے.

(جاری ہے)

لین جیان نے سوشل میڈیا پلیٹ فارم پر جاری بیان میں کہا کہ چینی وزیر خارجہ نے پاکستان میں صدر مملکت آصف علی زرداری ، وزیراعظم شہباز شریف اور آرمی چیف جنرل عاصم منیر سے ملاقاتیں کی ہیں جن میں دوطرفہ تعلقات کے عزم کا اعادہ کیا گیا. چینی وزارت خار جہ نے کہا ہے کہ عالمی منظرنامے میں تاریخی تبدیلیوں، بڑھتے ہوئے عدم استحکام اور غیر یقینی صورت حال میں علاقائی امن و استحکام کےلئے پاکستان اور چین کے درمیان مضبوط دوستی ناگزیر ہے چینی وزارت خارجہ نے اس عزم کا اظہار بھی کیا ہے کہ چین پاکستان کی علاقائی سالمیت اور قومی سلامتی کی حمایت جاری رکھے گا.

ترجمان نے کہا چین اور پاکستان کی دوستی وقت کے امتحان پر پوری اتری ہے اور ناقابل شکست رہی ہے، چین پاکستان کے ساتھ مل کر روایتی تعلقات کو مزید گہرا کرنے، تزویراتی ہم آہنگی کو بڑھانے کےلئے پرعزم ہے واضح رہے کہ چینی وزیر خارجہ وانگ یی نے 20 سے 22 اگست 2025 تک پاکستان کا سرکاری دورہ کیا، جس میں انہوں نے پاکستانی صدر آصف علی زرداری، وزیراعظم شہباز شریف، آرمی چیف جنرل عاصم منیر، اور وزیر خارجہ اسحاق ڈار سے ملاقاتیں کیں. چینی وزیر خارجہ کا یہ دو روزہ دورہ چھٹے پاک،چین وزرائے خارجہ سٹریٹجک ڈائیلاگ کے سلسلے میں تھا، اس دورے کا مقصد چین،پاکستان اقتصادی راہداری کے دوسرے مرحلے، تجارت، معاشی تعاون، دفاع، سکیورٹی، اور علاقائی استحکام پر بات چیت کرنا تھا.