محکمہ موسمیات کی 29اگست تا 2ستمبر ملک بھر میں مزید بارشوں کی پیشگوئی

جمعرات 28 اگست 2025 13:23

اسلام آباد(اُردو پوائنٹ اخبارتازہ ترین - این این آئی۔ 28 اگست2025ء)محکمہ موسمیات نے ملک بھر میں، ایک بار پھر29اگست تا 2ستمبر بارشوں کی پیش گوئی کردی، پہاڑی علاقوں میں شدید بارشوں کے پیش نظر لینڈ سلائیڈنگ کا بھی خطرہ ظاہر کیا گیا ہے۔ محکمہ موسمیات نے ایک بار پھر ملک بھر میں بارشوں کی پیش گوئی کردی ہے۔محکمہ موسمیات کے مطابق 29اگست تا 2ستمبر ملک کے مختلف حصوں میں بارشوں کا امکان اور پہاڑی علاقوں میں لینڈ سلائیڈنگ کا خطرہ ہے۔

محکمہ موسمیات کے اعلامیے کے مطابق 29اگست تا 2ستمبر کشمیر اور گلگت بلتستان میں گرج چمک کے ساتھ بارش متوقع ہے، جبکہ چترال، دیر، سوات، کوہستان، مانسہرہ، ایبٹ آباد، نوشہرہ میں بھی بارش ہوسکتی ہے۔محکمہ موسیات کے اعلامیے میں کہا گیا کہ کوہاٹ، پشاور، چارسدہ، مردان، صوابی، بنوں، لکی مروت، وزیرستان اور ڈی آئی خان میں بارش ہوگی۔

(جاری ہے)

اسی طرح اسلام آباد، راولپنڈی، مری، گلیات، گوجرانوالہ، لاہور، فیصل آباد ، سیالکوٹ، نارووال، خوشاب، سرگودھا میں بارش کا امکان ہے۔

محکمہ موسمیات نے پنجاب اور خیبر پختونخوا میں نشیبی علاقے زیر آب آنے کا خدشہ ظاہر کیا ہے۔محکمہ موسمیات کی جانب سے مٹھی، تھر پارکر، سکھر، لاڑکانہ، جیکب آباد، دادو میں بھی بارش کا امکان ظاہر کیا ہے، جبکہ بارکھان، موسی خیل، لورالائی، سبی، ژوب، قلات، اور خضدار میں بھی بارشوں کی پیش گوئی کی گئی ہے۔