راوی، چناب اور ستلج کے 12 ہیڈ ورکس پر پانی کے بہا ئوکی صورتحال

لاہور(اُردو پوائنٹ اخبارتازہ ترین - این این آئی۔ 28 اگست2025ء)پنجاب کے تین دریائوں میں اونچے درجے کا سیلاب آیا ہوا ہے جس سے اب تک لاکھوں افراد متاثر ہوئے ہیں۔پنجاب میں بہنے والے تین دریا چناب، راوی اور ستلج پر مجموعی طور پر 12 ہیڈ ورکس ہیں جہاں سے پانی کے بہا ئوکو ریگولیٹ کیا جاتا ہے ۔دریائے راوی پر اس وقت سب سے زیادہ پانی جسڑ اور شاہدرہ کے مقام پر ہے، جسڑ وہ مقام ہے جہاں سے بھارت سے پانی پاکستان میںداخل ہوتا ہے جبکہ شاہدرہ لاہور کے نزدیک واقع ہے، دریائے راوی پر بلوکی اور سدھنائی کے مقامات پر ہیڈ ورکس موجود ہیں۔

اس وقت جسڑ کے مقام پر اونچے درجے کا سیلاب ہے اور یہاں سے ایک لاکھ 21 ہزار کیوسک پانی گزر رہا ہے جبکہ سے شاہدرہ سے اس وقت ایک لاکھ 90 ہزار کیوسک پانی گزر رہا ہے۔

(جاری ہے)

بلوکی کے مقام پر اس وقت پانی کا بہائو94 ہزار کیوسک سے زائد ہے جبکہ یہاں سے تین لاکھ 80 ہزار کیوسک پانی باآسانی گزر سکتا ہے، بلوکی کے مقام پر پانی کے بہائو میں اضافہ ہو رہا ہے۔دریائے راوی پر چوتھا ہیڈ ورکس سدھنائی کے مقام پر موجود ہے جو ایک لاکھ 50 ہزار کیوسک پانی ریگولیٹ کرنے کی صلاحیت رکھتا ہے، یہاں اس وقت پانی کی سطح معمول کے مطابق ہے اور بہائونو ہزار کیوسک سے کچھ اوپر ہے۔

فلڈ فورکاسٹنگ ڈویژن کے مطابق دریائے چناب میں اس وقت قادرآباد ہیڈ ورکس کے مقام پر سب سے زیادہ پانی کا دبائوہے جہاں 8لاکھ 13 ہزار کیوسک پانی کا ریلا گزر رہا ہے، قادرآباد سے آٹھ لاکھ 7 ہزار کیوسک پانی باآسانی گزر سکتا ہے۔چناب پر بنے خانکی ہیڈ ورکس کے مقام پر اس وقت انتہائی اونچے درجے کا سیلاب ہے جہاں سے 6 لاکھ 20 ہزار کیوسک پانی کا ریلا گزر رہا ہے، خانکی ہیڈ ورکس 11 لاکھ کیوسک پانی ریگیولیٹ کرنے کے صلاحیت رکھتا ہے۔

قادرآباد اور خانکی ہیڈورکس پر پانی کے دبائومیں کمی آ رہی ہے۔اس کے علاوہ دریائے چناب پر مرالہ، تریموں اور پنجند پر بھی ہیڈ ورکس موجود ہیں۔مرالہ پر آٹھ لاکھ 13 ہزار کیوسک کا ریلا گزر رہا ہے، یہ ہیڈ ورکس 11 لاکھ کیوسک پانی کو ریگولیٹ کرنے کی صلاحیت رکھتا ہے۔تریموں ہیڈ ورکس پر اس وقت پانی کی سطح معمول کے مطابق ہے لیکن اس میں مسلسل اضافہ ہو رہا ہے، تریموں سے اس وقت 93 ہزار 500 کیوسک پانی گزر رہا ہے جبکہ اس کی استعداد6لاکھ 45 کیوسک ہے۔

پنجند کے مقام پر اس وقت پانی کا بہائو 58 ہزار کیوسک ہے جو کہ معمول کے مطابق ہے اور اس میں کمی آ رہی ہے،پنجند ہیڈ ورکس 7لاکھ کیوسک پانی کو ریگولیٹکرنے کی صلاحیت رکھتا ہے۔دریائے ستلج پر گنڈا سنگھ والا، سلیمانکی اور اسلام ہیڈ ورکس موجود ہیں۔گنڈا سنگھ والا ہیڈ ورکس کے مقام پر اس وقت انتہائی اونچے درجے کا سیلاب ہے جہاں سے 2 لاکھ 61 ہزار کیوسک پانی کا ریلا گزر رہا ہے۔

دریائے ستلج پر بنے سلیمانکی ہیڈ ورکس کے مقام پر درمیانے درجے کا سیلاب ہے اور پانی کا بہائواس وقت ایک لاکھ 9 ہزار کیوسک ہے، اس ہیڈ ورکس سے 3 لاکھ 25 ہزار کیوسک با آسانی گزر سکتا ہے۔اسلام ہیڈ ورکس سے اس وقت 52 ہزار کیوسک پانی کا ریلا گزر رہا ہے جو کہ نچلے درجے کے سیلاب کے زمرے میں آتا ہے، اسلام ہیڈ ورکس 3لاکھ کیوسک پانی کو ریگولیٹ کرنے کی صلاحیت رکھتا ہے۔