ہارون اختر خان کی زیرِ صدارت اجلاس،ڈرگ ریگولیٹری اتھارٹی کا روس کے ساتھ انسولین کی پیداوار کے حوالے سے جائزہ لیا گیا

روس کے ساتھ انسولین مینوفیکچرنگ کا منصوبہ دو طرفہ تعلقات کے ایک نئے دور کی بنیاد رکھے گا، معاون خصوصی کا اجلاس سے خطاب

جمعرات 28 اگست 2025 18:40

اسلام ابٓاد (اُردو پوائنٹ اخبارتازہ ترین - این این آئی۔ 28 اگست2025ء)وزیرِ اعظم کے معاونِ خصوصی برائے صنعت و پیداوار ہارون اختر خان کی زیر صدارت آج ڈرگ ریگولیٹری اتھارٹی آف پاکستان (DRAP) کا ایک اعلیٰ سطح اجلاس منعقد ہوا جس میں روس کے ساتھ انسولین کی پیداوار کے مشترکہ منصوبے پر غور کیا گیا۔اجلاس میں روسی حکومت کے نمائندے ڈینس نزاروف، سیکرٹری صنعت و پیداوار سیف انجم اور ڈرگ ریگولیٹری اتھارٹی کے اعلیٰ حکام شریک ہوئے۔

اجلاس میں پاکستان میں مقامی سطح پر انسولین کی تیاری اور روس کے ساتھ مشترکہ منصوبے کے قیام پر تفصیلی تبادلہ خیال کیا گیا۔اس موقع پر ہارون اختر خان نے کہا کہ روس کے ساتھ انسولین مینوفیکچرنگ کا منصوبہ دو طرفہ تعلقات کے ایک نئے دور کی بنیاد رکھے گا۔

(جاری ہے)

انہوں نے زور دیا کہ وزیرِ اعظم شہباز شریف کی قیادت میں غیر ملکی سرمایہ کاری اور ٹیکنالوجی کی منتقلی کو یقینی بنایا جائے گا۔

ہارون اختر خان نے کہا کہ پاکستان میں انسولین کی تیاری مرحلہ وار ہوگی جبکہ تین سال کے اندر بلک پروڈکشن اور ٹیکنالوجی ٹرانسفر کو عملی شکل دی جائے گی۔ انہوں نے کہا کہ یہ مشترکہ منصوبہ کاروباری تعاون کے نئے مواقع فراہم کرے گا اور عوام کو ضروری ادویات کی فراہمی کو یقینی بنائے گا۔انہوں نے اس بات پر بھی زور دیا کہ منصوبے کی کامیابی کے لیے شراکت دار کمپنیوں کی سخت پابندی اور عمل درآمد لازمی ہوگا۔