میئر نیویارک ایرک ایڈمز کی پہلی بار پاکستان ہیریٹیج ڈے استقبالیہ کی میزبانی، پاکستانی نژاد امریکی کمیونٹی کی خدمات کو خراج تحسین

نیویارک (اُردو پوائنٹ اخبارتازہ ترین - اے پی پی۔ 29 اگست2025ء) نیویارک کے میئر ایرک ایڈمز نے پاکستانی نژاد امریکی کمیونٹی کی سماجی، ثقافتی اور معاشی شعبوں میں نمایاں خدمات کو سراہتے ہوئے کہا ہے کہ سٹی انتظامیہ دنیا کی تمام کمیونٹیز بشمول متحرک پاکستانی ڈائیسپورا کے ساتھ تعلقات مزید مضبوط بنانے کے لیے پرعزم ہے۔وہ گزشتہ روز میئر آفس کی جانب سے گریسی مینشن میں پاکستان کے 78ویں یوم آزادی کے موقع پر پہلی بار منعقدہ پاکستان ہیریٹیج ڈے استقبالیہ سے خطاب کر رہے تھے۔

تقریب میں اقوام متحدہ میں پاکستان کے مستقل مندوب سفیر عاصم افتخار احمد، نیویارک میں پاکستان کے قونصل جنرل عامر احمد اتو زئی،سرکاری حکام، سیاسی رہنماؤں، سفارتکاروں اور بڑی تعداد میں پاکستانی نژاد امریکی کمیونٹی کے ممتاز افراد نے شرکت کی۔

(جاری ہے)

اس موقع پر پاکستان میں حالیہ سیلاب کے متاثرین کی یاد میں ایک منٹ کی خاموشی اختیار کی گئی۔

میئر ایرک ایڈمز نے پاکستانی نژاد امریکی کمیونٹی کو یوم آزادی کی مبارکباد دی۔اپنے خطاب میں قونصل جنرل عامر احمد اتو زئی نے پاکستانی نژاد امریکی کمیونٹی کی خدمات کے اعتراف اور پاکستان ہیریٹیج ڈے منانے پر میئر نیویارک کا شکریہ ادا کیا۔ انہوں نے اس بات پر زور دیا کہ پاکستانی نژاد امریکی کمیونٹی نیویارک کی شہری اور معاشی ترقی کا لازمی حصہ ہے جو طب، تعلیم، ٹیکنالوجی، عوامی خدمت اور فنون لطیفہ سمیت مختلف شعبوں میں نمایاں کارکردگی دکھا رہی ہے۔

اس موقع پر سفیر عاصم افتخار احمد نے بھی کمیونٹی کو یوم آزادی کی مبارکباد دی اور پاکستان-امریکا تعلقات کو مضبوط بنانے میں ان کے کردار کو سراہا۔ انہوں نے اعادہ کیا کہ پاکستان اپنی خودمختاری کے دفاع کی مکمل صلاحیت رکھتا ہے اور ساتھ ہی امن، ترقی اور عالمی برادری کے ساتھ باہمی تعاون کے لیے بھی کوشاں ہے۔دونوں پاکستانی سفارتکاروں نے میئر آفس برائے بین الاقوامی امور بالخصوص کمشنر ایساتا کیمارا کا پاکستانی نژاد کمیونٹی کے ساتھ مسلسل تعاون اور پاکستان ہیریٹیج ڈے کی تاریخی تقریب ممکن بنانے پر شکریہ ادا کیا۔

تقریب کے اختتام پر پاکستان اور امریکا کے درمیان پائیدار دوستانہ تعلقات اور پاکستانی نژاد امریکی کمیونٹی کے دونوں ممالک کے درمیان پل کے طور پر اہم کردار کو تسلیم کیا گیا۔\932