Live Updates

سیلاب سے متاثرہ تمام مذہبی مقامات کو اصل حالت میں بحال کیا جائیگا، فیلڈ مارشل

اقلیتوں اور ان کے مذہبی مقامات کا تحفظ ریاست اور اس کے اداروں کی ذمہ داری ہے، پاکستان اپنی ذمے داری ادا کرنے میں کوئی کسر نہیں چھوڑے گا، سیالکوٹ شکر گڑھ، نارووال اور کرتارپور کے دورہ کے موقع پر گفتگو

جمعہ 29 اگست 2025 16:55

راولپنڈی (اُردو پوائنٹ اخبارتازہ ترین - این این آئی۔ 29 اگست2025ء)فیلڈ مارشل سید عاصم منیر نے کہاہے کہ سیلاب سے متاثرہ تمام مذہبی مقامات کو اصل حالت میں بحال کیا جائیگا۔پاک فوج کے شعبہ تعلقاتِ عامہ (آئی ایس پی آر) کے مطابق فیلڈ مارشل سید عاصم منیر نے سیالکوٹ سیکٹر، شکرگڑھ، نارووال اور کرتارپور کا دورہ کیا اور سیلاب سے متاثرہ علاقوں کا جائزہ لیا۔

فیلڈ مارشل سید عاصم منیر کو موجودہ صورتحال اور بارشوں کے آئندہ سلسلے کے لیے تیاریوں پر بریفنگ بھی دی گئی۔انہوں نے علاقے کی متاثرہ سکھ برداری سے ملاقات کی اور کہا کہ اقلیتوں اور ان کے مذہبی مقامات کا تحفظ ریاست اور اس کے اداروں کی ذمہ داری ہے، پاکستان اپنی ذمے داری ادا کرنے میں کوئی کسر نہیں چھوڑے گا۔فیلڈ مارشل سید عاصم منیر نے کہا کہ سیلاب سے متاثرہ تمام مذہبی مقامات کو اصل حالت میں بحال کیا جائے گا، دربار صاحب کرتارپور کو ترجیحی بنیادوں پر اصل حالت میں بحال کیا جائے گا۔

(جاری ہے)

آئی ایس پی آر کے مطابق سول انتظامیہ کے نمائندوں سے گفتگو میں آرمی چیف نے بروقت اور فعال اقدامات کی بھی تعریف کی۔ کور کمانڈر گوجرانوالہ نے ان کا استقبال کیا، اس موقع پر آرمی چیف نے متاثرہ سکھ برادری سے ملاقات کی اور یقین دہانی کرائی کہ سیلاب سے متاثرہ تمام مذہبی مقامات، بشمول دربار صاحب کرتارپور کو ترجیحی بنیاد پر مکمل طور پر بحال کیا جائے گا۔سکھ برادری نے سول انتظامیہ اور فوج کی طرف سے فراہم کردہ سہولیات پر آرمی چیف کا شکریہ ادا کیا، آرمی چیف نے دربار صاحب کرتارپور کا فضائی جائزہ بھی لیا۔