Live Updates

گورنر سندھ کے زیرِ اہتمام گورنر ہائوس میں تیسرے روز بھی جشنِ عید میلاد النبی ﷺ کی روحانی محافل جاری

جمعہ 29 اگست 2025 23:28

کراچی (اُردو پوائنٹ اخبارتازہ ترین - این این آئی۔ 29 اگست2025ء)گورنر سندھ کامران خان ٹیسوری کی زیرِ صدارت گورنر ہاؤس کراچی میں جشنِ عید میلاد النبی ﷺ کی پرنور محافل کا سلسلہ تیسرے روز بھی جاری رہا۔ روحانی فضا میں منعقدہ اس تقریب میں ایم کیو ایم پاکستان کے سینئر مرکزی رہنما ڈاکٹر فاروق ستار، انیس قائمخانی سمیت متعدد شخصیات نے شرکت کی۔ تقریب میں معروف نعت خواں قاری اسد الحق، وسیم وصی اور دیگر نے بارگاہِ رسالت ﷺ میں عقیدت کے پھول نچھاور کیے، جبکہ مفتی محمد اکمل مدنی نے سیرتِ طیبہ ﷺ پر جامع اور مؤثر بیان پیش کیا۔

گورنر سندھ نے روحانی محفل سے خطاب کرتے ہوئے کہا کہ اللہ کا شکر ہے کہ ہمیں 1500ویں جشنِ ولادتِ رسول ﷺ منانے کی سعادت حاصل ہوئی ہے۔ انہوں نے اعلان کیا کہ ربیع الاول کی خوشبو سے مہکتی یہ محافل 30 دن تک جاری رہیں گی، جن میں ملک کے ممتاز نعت خواں اور اسکالرز کو مدعو کیا جائے گا۔

(جاری ہے)

گیارہویں شب کو اویس قادری اور صدیقی اسماعیل نعت خوانی کریں گے، جبکہ بارہ ربیع الاول کو معروف قوال فرید ایاز اور ان کی ٹیم قوالی پیش کریں گے۔

گورنر سندھ نے سیلاب متاثرین کے لیے خصوصی دعاؤں کی اپیل کی اور بھارت کی آبی جارحیت پر تشویش کا اظہار کرتے ہوئے کہا کہ متاثرین کی بحالی میں ہر فرد کو اپنا کردار ادا کرنا چاہیے۔ انہوں نے کہاکہ عوامی مسائل کے حل کے لیے گورنر ہاؤس کے دروازے کھلے ہیں،والدین اگر بچوں کی اسکول فیس کی ادائیگی میں پریشان ہیں تو وہ ہم سے رابطہ کریں، انشاء اللہ ان کی مدد کی جائے گی۔ گورنر سندھ نے کہا کہ ہمیں دوسروں پر تنقید کے بجائے اپنی اصلاح کرنی چاہیے۔ انہوں نے عوام سے بھروسہ رکھنے کی اپیل کرتے ہوئے کہا کہ گورنر ہاؤس عوام کے لیے ہے، اور ہم آپ کو تنہا نہیں چھوڑیں گے۔