ڈیموکریٹک فریڈم پارٹی کا بزرگ قائد سید علی گیلانی کی برسی پرخراج عقیدت پیش

سرینگر (اُردو پوائنٹ اخبارتازہ ترین - اے پی پی۔ 30 اگست2025ء) بھارت کے غیر قانونی زیرتسلط جموں و کشمیرمیں ڈیموکریٹک فریڈم پارٹی (ڈی ایف پی) نے بزرگ حریت قائد سید علی شاہ گیلانی کو ان کے یوم شہادت کے موقع پر خراج عقیدت پیش کرتے ہوئے کہا کہ شہید رہنما کی زندگی بھر کی جدوجہد، ثابت قدمی اور کشمیر کاز سے غیر متزلزل وابستگی آزادی پسند کشمیریوں کےلئے مشعل راہ ہے۔

کشمیر میڈیا سروس کے مطابق ڈی ایف پی کے ترجمان ایڈووکیٹ ارشد اقبال نے سرینگر میں جاری بیان میں کہا کہ سید علی گیلانی تنازعہ کشمیر کے بارے میں اپنے موقف پر پوری زندگی ایک چٹان کی طرح ڈٹے رہے ، تحریک آزادی میں ایک لازوال کردار پر کشمیر کی تاریخ میں ان کا ذکر سنہری حروف میں کیا جائے گا۔ترجمان نے کہا کہ سید علی گیلانی ایک نڈر رہنما تھے جو مکار دشمن کیساتھ کسی قسم کا کوئی سمجھوتہ کرنے کے بجائے محکوم لوگوں کی ایک جاندار آواز بن گئے۔

(جاری ہے)

انہوں نے کہا کہ بھارت نے شہید رہنما کی رات کی تاریکی میں خفیہ تدفین کی اور ان کے لاکھوں چاہنے والوں کو ان کے جنازے سے دو ر رکھا ۔انہوں نے کہا کہ کشمیری عوام سید علی گیلانی اور دیگر لاکھوں کشمیری شہداکے مشن کو ہرقیمت پر اس کے منطقی انجام تک پہنچائیں گے۔دریں اثنا، ڈی ایف پی کے ترجمان نے پارٹی کے زیر حراست چیئرمین شبیر احمد شاہ اور بھارتی جیلوں میں بند دیگر کشمیریوں کی بگڑتی ہوئی صحت پر گہری تشویش کا اظہار کرتے ہوئے انسانی حقوق کی بین الاقوامی تنظیموں پر زور دیا کہ وہ اس معاملے کا موثر نوٹس لیں اور تما م کشمیری سیاسی نظر بندوں کی رہائی کے لیے بھارت پر دبائو ڈالیں۔

حریت رہنما پیرزادہ عطا اللہ نے سرینگر میں جاری بیان میں سید علی گیلانی کو خراج عقیدت پیش کرتے ہوئے کہا کہ بزرگ قائد پوری زندگی انتہائی عزم و حوصلے سے جموں وکشمیر کے غیر قانونی بھارتی تسلط سے آزادی کیلئے جدوجدہ کرتے رہے۔ انہوں نے کہا کہ سید علی گیلانی دل کی گہرائیوں سے پاکستان کے ساتھ محبت کرتے تھے، وہ جموں وکشمیر کا پاکستان سے الحاق چاہتے تھے اور ان کا کا دیا ہوا” ہم پاکستانی ہیں، پاکستان ہمارا ہے“ کا نعرہ آج پوری دنیا میں گونج رہا ہے ۔

یاد رہے کہ سید علی گیلانی یکم ستمبر2021 کو سرینگر کے علاقے حیدر پورہ میں اپنی رہائش گاہ پر بھارتی پولیس کی حراست کے دوران شہید ہوئے جہاں انہیں ایک دہائی سے زائد عرصے تک مسلسل نظربند رکھا گیاتھا۔ بھارتی فورسز اہلکاروں نے سیدعلی گیلانی کی وصیت کے برعکس رات کی تاریکی میں ان کی میت قبضے میں لےکر حیدر پورہ کے قبرستان میں ان کی زبردستی تدفین کردی تھی جبکہ بزرگ قائد نے عید گاہ مزار شہدامیں تدفین کی وصیت کر رکھی تھی۔