مشیر آئی پی آر مصباح کھًر کی انٹر پارلیمنٹری اسپیکرز کانفرنس کی سفیر کے طور پر تقرری ، پاکستان اور خواتین قیادت کے لیے سنگِ میل قرار

ہفتہ 30 اگست 2025 17:50

اسلام آباد(اُردو پوائنٹ اخبارتازہ ترین - این این آئی۔ 30 اگست2025ء)چیئرمین سینیٹ کے مشیر کے طور پر خدمات سرانجام دینے والی مسز مصباح کھًر کی انٹر پارلیمنٹری اسپیکرز کانفرنس کی سفیر کے عہدے پر حالیہ تقرری کے اعزاز میں اسلام آباد میں یحییٰ کھًر کی جانب سے عشائیے کا اہتمام کیا گیا۔تقریب میں چیئرمین سینیٹ سید یوسف رضا گیلانی، اسپیکر قومی اسمبلی سردار ایاز صادق سمیت کئی معزز شخصیات نے شرکت کی۔

اس موقع پر سینیٹر عامر چشتی، سینیٹر ذیشان خانزادہ، سینیٹر مشاہد حسین، اقوامِ متحدہ کے پاکستان میں ریزیڈنٹ کوآرڈینیٹر جناب محمد یحییٰ، سابق سیکرٹری خارجہ جلیل عباس جیلانی، ارکان پارلیمنٹ، سفارتکار اور اعلیٰ حکام بھی موجود تھے۔شرکاء نے مسز مصباح کھًر کی تقرری کو نہ صرف پاکستان بلکہ خطے بھر کی خواتین کے لیے ایک سنگِ میل قرار دیا۔

(جاری ہے)

انہوںنے کہاکہ آئی ایس سی کی سفیر کے طور پر ان کا انتخاب پاکستان کے پارلیمانی سفارتکاری کے کردار کو مزید مضبوط بنانے اور عالمی سطح پر تعاون کو فروغ دینے کی علامت ہے، ساتھ ہی یہ عالمی سیاسی فورمز پر خواتین رہنماؤں کے بڑھتے ہوئے اعتراف کی بھی عکاسی کرتا ہے۔یہ اعزاز پاکستان کے اٴْس عزم کو اجاگر کرتا ہے جو جامع نمائندگی اور خواتین کی قیادت کے فروغ کو بین الاقوامی سطح پر یقینی بنانے کے لیے کیا جا رہا ہے۔