پنجاب کے پرائیویٹ سکولوں کے تعلیمی کیلنڈر اور رولز بنانے کیلئے کمیٹی تشکیل

کمیٹی تعلیمی سال اور خصوصا چھٹیوں کی تجویز کے حوالے سے سپیشل رولز بنائے گی‘لاہور ہائیکورٹ

ہفتہ 30 اگست 2025 17:50

لاہور (اُردو پوائنٹ اخبارتازہ ترین - این این آئی۔ 30 اگست2025ء) لاہور ہائیکورٹ نے پنجاب کے پرائیوٹ سکولوں کی تعطیلات سے متعلق تعلیمی کیلنڈر اور رولز بنانے کے لیے کمیٹی تشکیل دیدی۔لاہور ہائیکورٹ کے جسٹس جواد حسن نے قرار دیا کہ کمیٹی پہلا اجلاس 11ستمبر کو منعقد کرے اور 16ستمبر کو عملدرآمد رپورٹ پیش کرے، آل پاکستان پرائیویٹ سکول مینجمنٹ ایسوسی ایشن نے سکولوں کی تعطیلات میں اضافے کے نوٹفکیشن کو لاہور ہائیکورٹ میں چیلنج کر رکھا تھا۔

درخواست گزار کی جانب سے موقف اختیار کیا گیا تھا کہ حکومت کی جانب سے کوئی بھی تعلیمی کیلنڈر مہیا نہیں کیا گیا، نجی سکول سلیبس کو سامنے رکھتے ہوئے خود ہی تعلیمی کیلنڈر بناتے ہیں، پنجاب حکومت کی جانب سے تعطیلات مین اضافے کا نوٹیفکیشن غیر قانونی ہے لہذا عدالت نوٹیفکیشن کالعدم قرار دے کر رولز بنانے کا حکم دے۔

(جاری ہے)

سرکاری وکیل نے عدالت کو بتایا کہ گرمی کی چھٹیاں قانون کے مطابق بڑھائی گئی ہیں، موسمی صورتحال اور پی ڈی ایم اے کے الرٹ کے باعث احتیاطی تدابیر اپنائی گئیں۔

جسٹس جواد حسن نے محکمہ سکول ایجوکیشن پنجاب کو تعلیمی سال کے لیے سپیشل رولز بنانے کا حکم دیتے ہوئے سیکرٹری سپیشل ایجوکیشن، ایڈووکیٹ جنرل پنجاب، سیکرٹری قانون سمیت دیگر پر مشتمل 13رکنی کمیٹی بنانے کا حکم جاری کردیا۔عدالت نے فیصلے میں لکھا کہ کمیٹی تعلیمی سال اور خصوصا چھٹیوں کی تجویز کے حوالے سے سپیشل رولز بنائے گی، کمیٹی کی پہلی میٹنگ سیکرٹری سکولز ایجوکیشن کے دفتر میں 11ستمبر کو منعقد ہوگی۔عدالت نے 16ستمبر کو فریقین سے عمل درآمد رپورٹ طلب کرلی۔