Live Updates

oپنجاب میں سیلاب کے بعد موسلادھار بارش، مشکلات میں اضافہ

شیخوپورہ اور گرد و نواح میں تیز بارش سے نشیبی علاقوں میں پانی جمع ‘جہلم اور گرد و نواح میں ندی نالے بپھر گئے‘ نشیبی علاقے زیرِ آب

ہفتہ 30 اگست 2025 18:25

9چنیوٹ، شیخوپورہ (اُردو پوائنٹ اخبارتازہ ترین - آن لائن۔ 30 اگست2025ء)ملک کے مختلف علاقوں میں بارش کا سلسلہ شروع ہوگیا۔ چنیوٹ میں سیلاب سے متاثرہ علاقوں میں دو گھنٹوں سے زائد مسلسل بارش کے باعث سیلاب متاثرین کی مشکلات میں اضافہ ہوگیا۔شیخوپورہ اور گرد و نواح میں تیز بارش سے نشیبی علاقوں میں پانی جمع ہوگیا جبکہ جہلم اور گرد و نواح میں بھی بارش سے ندی نالے بپھر گئے اور نشیبی علاقے زیرِ آب آگئے۔

ندی نالوں کا پانی آبادیوں میں داخل ہوگیا، اس دوران ریسکیو ٹیموں کو امدادی کارروائیوں میں مشکلات کا سامنا ہے۔ادھر دریائے ستلج میں گنڈاسنگھ والا کے مقام پر غیر معمولی سیلاب کے باعث تلوار پوسٹ سے ملحقہ دیہات خالی کرانے کے لیے اعلانات کیے گئے ہیں۔دوسری جانب پشاور کے مختلف علاقوں میں بھی موسلا دھار بارش سے صدر، جی ٹی روڈ، گلبہار اور گورنر ہاؤس کے قریب شیر شاہ سوری روڈ پر پانی جمع ہوگیا۔

(جاری ہے)

باغ آزاد کشمیر میں موسلا دھار بارش سے نالہ ماہل میں طغیانی کے سبب نالے کے کنارے آباد بستی خالی کروالی گئی۔محکمہ موسمیات کے مطابق آج اسلام آباد، پنجاب، خیبرپختونخوا اور کشمیر کے بعض مقامات پر موسلادھار بارش کا امکان ہے۔اس کے علاوہ شام یا رات کو سندھ، بلوچستان اور گلگت بلتستان میں بھی کہیں کہیں بارش کی توقع ہے۔
Live سیلاب کی تباہ کاریاں سے متعلق تازہ ترین معلومات