,مودی سرکار کا پرانا ہتھکنڈہ بے نقاب، بہار انتخابات سے قبل بھارت کا پاکستان مخالف جھوٹا بیانیہ ایک بار پھر منظر عام پر آگیا

-نئی دہلی(اُردو پوائنٹ اخبارتازہ ترین - آن لائن۔ 30 اگست2025ء) بھارت نے ایک بار پھر پاکستان مخالف جھوٹے بیانیے کو فروغ دینے کی کوشش کی ہے، تاکہ اندرونی سیاسی مقاصد، خصوصاً ریاست بہار کے آئندہ انتخابات میں فائدہ حاصل کیا جا سکے۔ بھارتی میڈیا نے 28 اگست 2025 کو تین پاکستانی شہریوں حسنین علی، عادل حسین، اور محمد عثمان کو دہشتگرد قرار دیتے ہوئے بے بنیاد اور من گھڑت دعوے کیے، جنہیں فوری طور پر حقائق نے جھوٹا ثابت کر دیا۔

خبر میں دعویٰ کیا گیا کہ تینوں پاکستانی نیپال کے دارالحکومت کھٹمنڈو کے راستے بھارتی ریاست بہار میں داخل ہوئے، اور اس پر پورے ملک میں ریڈ الرٹ جاری کر دیا گیا۔ تاہم تینوں نوجوانوں کے انفرادی بیانات، سفری دستاویزات اور سفری روٹس نے اس بھارتی الزام کو بیبنیاد اور جھوٹا ثابت کر دیا۔

(جاری ہے)

راولپنڈی کے حسنین علی نے واضح کیا کہ وہ 10 اگست کو دبئی کے راستے نیپال پہنچا، جہاں 18 دن ہوٹل میں قیام کے بعد، 28 اگست کو ملائیشیا روانہ ہوا۔

نیپالی امیگریشن حکام نے پرواز کی تاخیر اور مالی وسائل کی تصدیق کے بعد ملائیشیا جانے کی اجازت دی تھی۔اسی طرح بہاولپور کے محمد عثمان اور میرپور خاص کے عادل حسین بھی دبئی اور کھٹمنڈو کے راستے ملائیشیا گئے، اور بعد ازاں قانونی طریقے سے کمبوڈیا میں ملازمت کیلئے روانہ ہوئے۔ تینوں پاکستانی شہری اس وقت کمبوڈیا میں قانونی ویزا پر مقیم ہیں اور وہاں کال سینٹرز میں ملازمت کر رہے ہیں۔

محمد عثمان نے بھارتی میڈیا کی خبر پر افسوس کا اظہار کرتے ہوئے کہا ہمیں بغیر کسی ثبوت کے دہشتگرد بنا دیا گیا، حالانکہ ہم نیپال کو صرف ٹرانزٹ کنٹری کے طور پر استعمال کر رہے تھے۔اسی طرح عادل حسین نے بھی کہا کہ وہ نیپال میں سیاحت اور کاغذی کارروائی کے لیے چند دن رکے، اس کے بعد کمبوڈیا چلے گئے۔ذرائع کا کہنا ہے کہ بھارتی میڈیا اور انٹیلی جنس ایجنسی را کی جانب سے یہ ایک منظم مہم تھی، جس کا مقصد مودی حکومت کو انتخابی فائدہ پہنچانا اور پاکستان کو عالمی سطح پر بدنام کرنا تھا۔

یہ پہلی مرتبہ نہیں، بھارت اس سے قبل بھی پہلگام فالس فلیگ آپریشن جیسے خود ساختہ ڈرامے رچا چکا ہے۔تجزیہ کاروں کا کہنا ہے کہ مودی حکومت کا یہ پرانا ہتھکنڈہ اب بری طرح بے نقاب ہو چکا ہے، اور خطے میں جھوٹ، پروپیگنڈا اور الزام تراشی کی سیاست بھارت کی ساکھ کو مسلسل نقصان پہنچا رہی ہے۔پاکستانی عوام اور ادارے ان جھوٹے بیانیوں کے خلاف متحد ہیں اور عالمی برادری سے مطالبہ کرتے ہیں کہ بھارت کے ایسے غیر ذمہ دارانہ اقدامات کا نوٹس لیا جائے۔