گورنر سندھ کامران خان ٹیسوری سے امریکہ کے نئے تعینات قونصل جنرل کی ملاقات ،دو طرفہ تعلقات پر تبادلہ خیال

ہفتہ 30 اگست 2025 19:10

کراچی (اُردو پوائنٹ اخبارتازہ ترین - اے پی پی۔ 30 اگست2025ء) گورنر سندھ کامران خان ٹیسوری سے امریکہ کے نئے تعینات قونصل جنرل چارلس گڈمن نے گورنر ہاؤ س میں ملاقات کی اوردو طرفہ تعلقات، سرمایہ کاری، تعلیم اور عوامی فلاحی منصوبوں پر تبادلہ خیال کیا ۔ ہفتہ کو گورنر ہائوس سے جاری اعلامیہ کے مطابق ملاقات میں گورنر سندھ نے کہا کہ اسپیشل انویسٹمنٹ فیسلیٹیشن کونسل (ایس آئی ایف سی) کے تحت بیرونی سرمایہ کاروں کو بھرپور معاونت فراہم کی جا رہی ہے اور پاکستان خصوصا ًسندھ میں امریکی سرمایہ کاری کے وسیع مواقع موجود ہیں۔

انہوں نے گورنر انیشیٹیوز کا ذکر کرتے ہوئے بتایا کہ امید کی گھنٹی کے ذریعے عوامی مسائل فوری طور پر حل کئے جاتے ہیں، راشن ڈرائیو کے تحت لاکھوں افراد میں راشن تقسیم کیا جا چکا ہے جبکہ گورنر ہاؤ س میں 50ہزار نوجوانوں کو مفت آئی ٹی کی جدید تعلیم فراہم کی جا رہی ہے، اس کے ساتھ ساتھ ہزاروں طلبہ و طالبات میں لیپ ٹاپ بذریعہ قرعہ اندازی تقسیم کئے گئے ہیں اور نوجوانوں کو بہترین بزنس پروپوزلز پر قرضہ حسنہ بھی دیا جا رہا ہے۔

(جاری ہے)

اس موقع پر قونصل جنرل چارلس گڈمن نے کہا کہ امریکی سرمایہ کار پاکستان میں سرمایہ کاری میں دلچسپی رکھتے ہیں۔ قونصل جنرل نے گورنر سندھ کامران خان ٹیسوری کی جاری فلاحی و عوامی سرگرمیوں کو بہت سراہا اور کہا کہ گورنر انیشیٹیوز عوامی فلاح و بہبود کی شاندار مثال ہے۔ قونصل جنرل نے پاکستانی کھانوں کی تعریف کی جس پر گورنر سندھ نے مل کر کھانا بنانے کی آفر دی اور انہیں کراچی کی فوڈ اسٹریٹ (برنس روڈ) کا دورہ کرنے کی دعوت بھی دی۔امریکی قونصل جنرل نے تاریخی گورنر ہاو س کے دورے کو اپنے لئے اعزاز قرار دیا اور مہمانوں کی کتاب میں تاثرات قلم بند کئے۔ آخر میں گورنر سندھ کامران خان ٹیسوری نے انہیں شیلڈ، جناح کیپ اور شال پیش کی۔