فیلڈ مارشل کی سکھ کمیونٹی کی تمام عبادت گاہوں کی جلد مکمل بحالی کی یقین دہانی

راولپنڈی /لاہور(اُردو پوائنٹ اخبارتازہ ترین - این این آئی۔ 30 اگست2025ء)آرمی چیف فیلڈ مارشل سید عاصم منیر نے کرتارپور میں سیلاب کی صورتحال کا جائزہ لیا اور سکھ کمیونٹی کی تمام عبادت گاہوں کی جلد مکمل بحالی کی یقین دہانی کروائی۔پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر نے سیلاب متاثرہ علاقوں سیالکوٹ، شکرگڑھ، نارووال اور کرتار پورکا دورہ کیا۔

سکھ کمیونٹی نے سیلاب متاثرہ دربار صاحب کرتار پور میں بروقت امدادی کارروائیوں پر فیلڈ مارشل سید عاصم منیر کو خراج تحسین پیش کیا اور آرمی چیف کے کرتارپور دورے اور بروقت امدادی کارروائیوں کو بھر پور الفاظ میں سراہا۔سکھ رہنما رمیش سنگھ اروڑہ نے کہا کہ سیلاب کے دوران بروقت امدادی کارروائیوں پر فیلڈ مارشل سید عاصم منیر کا تہہ دل سے شکریہ ادا کرتے ہیں جبکہ ہم سول انتظامیہ کا بھی ساتھ کھڑے رہنے پر شکریہ ادا کرتے ہیں۔

(جاری ہے)

انہوںنے کہاکہ فیلڈ مارشل نے ہمیں کہا تھا کہ جہاں ضرورت ہو گی ہمارے ہیلی کاپٹر موجود ہوں گے، اس پر بھی ہم ان کے شکرگزار ہیں جب کہ پاک فوج آخری شخص کی بحفاظت منتقلی تک ساتھ کھڑی رہی۔رمیش سنگھ نے کہاکہ پاکستان اور سکھوں کا رشتہ ہمیشہ قائم و دائم رہے گا، پاکستان ہماری دھرتی اور ہماری جان ہے، دنیا بھر کے سکھ آکر کہتے ہیں پاکستان اقلیتوں کے لیے محفوظ ترین ملک ہے، سکھ یاتری پاکستان سے جاتے ہیں تو آنکھوں میں خوشی کے آنسو ہوتے ہیں۔

انہوں نے کہا کہ فیلڈ مارشل سید عاصم منیر کے ساتھ بیٹھنے سے پوری دنیا میں سکھ برادری کا سر فخر سے بلند ہوگیا، دنیا کو جب پتا چلے گا کہ فیلڈ مارشل عاصم منیر نے خود کرتارپور کا دورہ کیا تو سکھوں کا مان مزید بڑھے گا۔فیلڈ مارشل سید عاصم منیر نے سکھ کمیونٹی سے خطاب کے دوران سکھ کمیونٹی کی تمام عبادت گاہوں کی جلد مکمل بحالی کی یقین دہانی کروائی۔

فیلڈ مارشل عاصم منیر کا شکریہ ادا کرتے ہوئے دیگر سکھ رہنماؤں نے کہا کہ آرمی چیف نے جو سکھ کمیونٹی کا مان بڑھایا اس پر پوری دنیا کے سکھوں کی طرف سے تہہ دل سے شکریہ ادا کرتے ہیں۔انہوں نے کہا کہ سیلاب کے بعد 24 گھنٹے میں جو آپ نے کیا اس کے لیے ہمارے پاس الفاظ نہیں ہیں، کرتارپور صاحب کے لیے آپ نے جو کیا اس پر بھر پور شکر گزار ہیں۔انہوںنے کہاکہ دنیا بھر کے سکھوں کا سر پاکستان کی طرف عقیدت و احترام کے ساتھ جھکتا ہے، دنیا بھر کے سکھوں کا پیار اور ہمدردیاں پاکستان کے ساتھ ہیں۔سکھ رہنماؤں نے کہا کہ پوری دنیا کے سکھ آپ کے مشکور ہیں، پاکستان ہمارے لیے حقیقی طور پر جنت ہے، پاک فوج سیلاب جیسی قدرتی آفت میں پاکستان کے عوام کی ہر ممکن مدد کے لیے ہمیشہ پیش پیش ہیں۔