سید علی گیلانی مقبوضہ کشمیر کی توانا آواز تھے ،زندگی کے آخری بارہ سال بدترین علالت کی حالت میں سفاک دشمن کی اسیری میں گزارے ، بیرسٹرسلطان

پیر 1 ستمبر 2025 20:17

اسلام آباد (اُردو پوائنٹ اخبارتازہ ترین - این این آئی۔ 01 ستمبر2025ء)آزاد جموں و کشمیر کے صدر بیرسٹر سلطان محمود چوہدری نے کہا ہے کہ عظیم حریت لیڈر شہید سید علی گیلانی نے اپنی پوری زندگی بچپن، جوانی، بڑھاپا مقبوضہ جموںو کشمیر کی آزادی کے لیے جدو جہد میں گزارا اور قید و بند کی صعوبتیں برداشت کیں۔ عظیم حریت رہنماء سید علی گیلانی کی برسی کے موقع پر اپنے خصوصی پیغام میں صدر ریاست آزاد جموں وکشمیر بیرسٹر سلطان محمود چوہدری نے کہا کہ سید علی گیلانی مقبوضہ کشمیر کی توانا آواز تھے انہوں نے اپنی زندگی کے آخری بارہ سال بدترین علالت کی حالت میں سفاک دشمن بھارت کی اسیری میں گزارے مگر ان کے پایہ استقلال میں لغزش نہ آئی۔

صدر ریاست آزاد جموں وکشمیر بیرسٹر سلطان محمود چوہدری نے کہا کہ ایسے وقت میں جب انہیں انتہائی نگہداشت کی ضرورت تھی بھارت کی سفاک فوج نے انہیں زبردستی نظر بند کئے رکھا مگر وہ سید علی گیلانی کی پاکستان اور تحریک آزادی کشمیرکے ساتھ نظریاتی وابستگی کو کم نہ کر سکے اور سید علی گیلانی الحاق پاکستان کے اصل داعی تھے۔

(جاری ہے)

سید علی گیلانی استقامت کا کوہ گراں تھے ان کی پوری زندگی جدوجہد سے عبارت ہے آخر دم تک وہ بھارت سے آزادی کے مشن پر کاربند رہے۔

صدر آزاد جموں وکشمیر بیرسٹر سلطان محمود چوہدری نے اس عزم کا اظہار کیا کہ ہم سید علی گیلانی کے تحریک آزادی کشمیر کے مشن کو جاری رکھتے ہوئے مقبوضہ کشمیر کی بھارت کے غاصبانہ اور جابرانہ قبضے سے آزادی تک اپنی جدوجہد جاری رکھیں گے۔