ملک بھر میں چُپ تعزیے کے جلوس، راستے بند، سکیورٹی ہائی الرٹ رہی

پولیس اور ضلعی انتظامیہ کے جلوسوں کے لیے‘‘فول پروف’’اقدامات‘ بم ڈسپوزل سکواڈز نے روٹس کی سویپنگ کی

منگل 2 ستمبر 2025 11:10

کراچی، لاہور، اسلام آباد(اُردو پوائنٹ اخبارتازہ ترین - این این آئی۔ 02 ستمبر2025ء) ملک کے مختلف شہروں میں ایامِ عزا کے الوداعی دن چُپ تعزیے کے جلوس عقیدت و احترام کے ساتھ برآمد ہو ئے، جلوسوں کے روایتی راستوں پر سکیورٹی کے سخت انتظامات کیے گئے ۔پولیس اور ضلعی انتظامیہ کے مطابق جلوسوں کے لیے‘‘فول پروف’’اقدامات کیے گئے اور بم ڈسپوزل سکواڈز نے روٹس کی سویپنگ مکمل کرلی گئی تھی، شہریوں کی سہولت کے لیے اضافی نفری، ایمبولینسز اور فائر ٹینڈرز الرٹ پر رہی۔

کراچی میں منگل کی صبح مرکزی چپ تعزیہ جلوس نشتر پارک سے برآمد ہوا جس سے قبل مجلس عزا سے علامہ باقر زیدی نے خطاب کیا۔جلوس ایم اے جناح روڈ، صدر، تبت سینٹر، عیدگاہ، لائٹ ہاؤس اور بولٹن مارکیٹ سے ہوتا ہوا روایتی مقام امام بارگاہ حسینیہ ایرانیاں کھارادر، نور باغ مسافر خانہ پر اختتام پذیر ہو ا۔

(جاری ہے)

شہر قائد کا دوسرا مرکزی جلوس نمازِ ظہر کے بعد قصرِ مسیّب، رضویہ سوسائٹی سے برآمد ہو کر مسجد و امام بارگاہ شاہِ نجف (مارٹن روڈ) پر ختم ہوا، جلوس کی سکیورٹی کیلئے پولیس و رینجرز کی بھاری نفری تعینات رہی۔

کراچی ٹریفک پولیس کے مطابق جلوسوں کے پیشِ نظر متعدد شاہراہیں بند اور متبادل راستے دیئے گئے تھے۔سکیورٹی کے ضمن میں شہر بھر میں چیک پوائنٹس اور کلیئرنس آپریشنز بھی کیے گئے جبکہ پانچ ہزار سے زائد اہلکار ڈیوٹی پر مامور رہے۔لاہور میں ایامِ عزا کا الوداعی چُپ تعزیہ جلوس پانڈو سٹریٹ، خیمہ سعادت سے برآمد ہو کر روایتی راستوں سے ہوتا ہوا کربلا گامے شاہ پر اختتام پذیر ہوا، ضلعی انتظامیہ اور ٹریفک پولیس نے داخلی راستوں پر ڈائیورشنز اور پارکنگ انتظامات مکمل کر لیے گئے تھے۔

وفاقی دارالحکومت اسلام آباد میں چُپ تعزیے کا مرکزی جلوس امام بارگاہ جی 6 سے برآمد ہواجس کے لیے حفاظتی اقدامات اور ٹریفک پلان وضع کیا گیا تھا، شہریوں کو متبادل راستے اختیار کرنے کی ہدایت کی گئی تطح۔چُپ تعزیہ عموماً 8 ربیع الاول کو ہوتا ہے اور امام حسن عسکریؑ کے یوم شہادت اور شہدائے کربلا کی نسبت سے روایتی عزاداری کی دو ماہ آٹھ دن کی مدت کے اختتام کی علامت سمجھا جاتا ہے، یہ روایت برصغیر بالخصوص لکھنؤ سے وابستہ ہے اور پاکستان میں کراچی سمیت کئی شہروں میں برسوں سے منظم انداز میں نکالی جاتی ہے۔