امریکی صدر کا وینزویلا سے روانہ ہونے والی منشیات بردار کشتی کو تباہ کرنے کا دعویٰ

بدھ 3 ستمبر 2025 11:10

واشنگٹن (اُردو پوائنٹ اخبارتازہ ترین - اے پی پی۔ 03 ستمبر2025ء) امریکا کے صدر ڈونلڈ ٹرمپ نے دعویٰ کیا ہے کہ امریکی فورسز نے وینزویلا سے روانہ ہونے والی منشیات بردار کشتی کو نشانہ بنایا اور اسے تباہ کر دیا ہے تاہم ماہرین اسے امریکا اور وینزویلا کے درمیان کشیدگی میں ایک نمایاں اضافہ قرار دے رہے ہیں۔اے ایف پی کے مطابق ٹرمپ نے وائٹ ہاؤس میں صحافیوں کو بتایا کہ امریکی فورسز نے ایک کشتی کو نشانہ بنایا، یہ منشیات سے بھری ہوئی کشتی تھی، جس میں بہت زیادہ منشیات موجود تھیں تاہم انہوں نے آپریشن کی مزید تفصیلات فراہم نہیں کیں۔

امریکی وزیر خارجہ مارکو روبیو نے سوشل میڈیا پلیٹ فارم ایکس پر اپنی پوسٹ میں لکھا کہ امریکی فوج نے حملہ کیا جس میں وینزویلا سے نکلنے والی منشیات بردار کشتی کو نشانہ بنایا گیا۔

(جاری ہے)

امریکی محکمہ دفاع کے ایک سینئر عہدیدار نے بھی کارروائی کی تصدیق کرتے ہوئے کہا کہ پریسیژن سٹرائیک سے متعلق مزید معلومات بعد میں جاری کی جائیں گی۔یہ اعلان اس وقت سامنے آیا ہے جب واشنگٹن اور کاراکاس کے درمیان کشیدگی میں مسلسل اضافہ ہو رہا ہے۔

وینزویلا کے صدر نکولس مادورو نے حال ہی میں ملک میں زیادہ سے زیادہ تیاری کی حالت نافذ کر دی ہے تاکہ امریکی خطرات کا مقابلہ کیا جا سکے۔یاد رہے کہ امریکا نے وینزویلا کے صدر نکولس مادورو کے خلاف دباؤ بڑھاتے ہوئے ان کی گرفتاری پر انعام 25 ملین ڈالر سے بڑھا کر 50 ملین ڈالر کر دیا ہے۔ ٹرمپ کی پہلی صدارتی مدت سے ہی مادورو ان کے نشانے پر ہیں ۔گزشتہ ہفتے وینزویلا نے اقوام متحدہ سے مطالبہ کیا تھا کہ امریکا کی فوجی تعیناتی کو ختم کرایا جائے جبکہ نکولس مادورو نے کہا کہ اگر حملہ ہوا تو وینزویلا ملکی دفاع کے لیے مسلح جدوجہد کے لیے تیار ہے۔