وزیراعظم شہباز شریف کے حالیہ دورہ چین سے پاک چین تعلقات بے مثال بلندیوں پر پہنچ گئے ہیں، وزیر اطلاعات عطاء اللہ تارڑ

بیجنگ (اُردو پوائنٹ اخبارتازہ ترین - اے پی پی۔ 04 ستمبر2025ء) وفاقی وزیر اطلاعات و نشریات عطاء اللہ تارڑ نے وزیراعظم شہباز شریف کے دورہ چین کو انتہائی اہمیت کا حامل قرار دیتے ہوئے کہا ہے کہ اس دورے سے پاکستان اور چین کے تعلقات نئی اور بے مثال بلندیوں تک پہنچ گئے ہیں۔ دوسری پاک چین بی ٹو بی انوسٹمنٹ کانفرنس کے افتتاحی اجلاس کے بعد میڈیا سے گفتگو کرتے ہوئے وفاقی وزیر اطلاعات نے کہا کہ وزیراعظم شہباز شریف کی قیادت میں حکومت سی پیک 2.0 کی ترقی کو اولین ترجیح دے رہی ہے۔

انہوں نے واضح کیا کہ سی پیک کے دوسرے مرحلے کا محور بی ٹو بی شراکت داری، پاکستان میں صنعتی ترقی، علاقائی روابط میں اضافہ اور قراقرم ہائی وے (کے کے ایچ) کی از سر نو تعمیر و توسیع ہے۔ آئی ٹی اور معدنیات کے شعبوں میں مواقع کو اجاگر کرتے ہوئے وفاقی وزیر اطلاعات نے مصنوعی ذہانت پر مبنی ترقی کی اہمیت پر زور دیا۔

(جاری ہے)

انہوں نے کہا کہ وزیراعظم چین کے صدر شی جن پنگ کے لئے بہت احترام رکھتے ہیں اور انہیں اپنا رول ماڈل تصور کرتے ہیں جبکہ دورہ چین کے دوران چینی قیادت کے ساتھ ہونے والی ملاقاتیں نہایت خوشگوار اور پرخلوص رہیں۔

انہوں نے کہا کہ دنیا نے دیکھا ہے کہ پاک چین ہر موسم کی سٹریٹجک پارٹنر شپ چٹان کی طرح مضبوط ہے، ہمیں فخر ہے کہ ہمیں آئرن برادرز کہا جاتا ہے، یہ رشتہ ہمارے عوام کے لئے حقیقی طور پر باعث تحریک ہے۔ سی پیک 2.0 کے تحت نوجوانوں کو بااختیار بنانے کے حوالے سے وزیر اطلاعات نے عوامی سطح پر روابط کی اہمیت اور چین کے مزید نوجوانوں کو پاکستان کا دورہ کرنے پر زور دیا۔

انہوں نے چینی سوشل میڈیا انفلوئنسرز کو دعوت دی کہ وہ پاکستان کی ثقافت، آئی ٹی کے شعبے اور وسیع سیاحتی امکانات کو قریب سے دیکھیں اور اجاگر کریں۔ وفاقی وزیر اطلاعات نے کہا کہ پاک چین دوستی ہماری ثقافت میں رچی بسی ہے، یہ رشتہ واقعی ہمارے خون کا حصہ ہے۔ انہوں نے اعلان کیا کہ پاکستان کا نوجوانوں پر مشتمل ایک وفد جلد چین کا دورہ کرے گا تاکہ نئی نسلوں کے درمیان دوطرفہ تعلقات کو مزید مضبوط بنایا جا سکے۔

انہوں نے اس عزم کا اظہار کیا کہ سوشل میڈیا اور میڈیا کے شعبوں میں تعاون کو فروغ دیا جائے گا تاکہ دونوں ممالک کے نوجوان انفلوئنسرز کے درمیان روابط میں اضافہ ہو۔عطاء اللہ تارڑ نے کہا کہ پاکستان اور چین کے درمیان دوطرفہ تجارت تیزی سے فروغ پا رہی ہے، پاکستانی صنعت کار چینی منڈی تک رسائی کے خواہاں ہیں جبکہ چینی کاروباری ادارے پاکستان میں مواقع تلاش کر رہے ہیں۔ انہوں نے کہا کہ دونوں ممالک کی منڈیاں ایک دوسرے کے لئے کھلی ہیں، چینی صنعتوں کے لئے پاکستان میں کارخانے قائم کرنے اور اسے برآمدات کے مرکز کے طور پر استعمال کرنے کے بے پناہ امکانات موجود ہیں۔ مشترکہ منصوبوں، سرمایہ کاری اور بزنس ٹو بزنس روابط کے ذریعہ ہم اپنے تعاون کو نئی بلندیوں تک لے جا سکتے ہیں۔