اقوام متحدہ کا "دو ریاستی حل" کانفرنس دوبارہ شروع کرنے کا فیصلہ، امریکا نے مخالفت کر دی

ہفتہ 6 ستمبر 2025 13:10

اقوام متحدہ (اُردو پوائنٹ اخبارتازہ ترین - اے پی پی۔ 06 ستمبر2025ء) اقوام متحدہ کی جنرل اسمبلی نے فیصلہ کیا ہے کہ دو ریاستی حل کے بارے میں ایک اعلیٰ سطحی بین الاقوامی کانفرنس 22 ستمبر کو دوبارہ شروع کی جائے گی۔العربیہ کے مطابق کانفرنس کے ذریعے اس عمل کو بحال کیا جا رہا ہے جو اس موسمِ گرما مشرقِ وسطیٰ میں بڑھتی ہوئے تشدد کی لہر کے دوران معطل کر دیا گیا تھا۔

جنرل اسمبلی نے یہ زبانی قرارداد جمعے کے روز منظور کی۔ قرارداد سعودی عرب نے پیش کی تھی، جس میں فلسطین کے مسئلے کے پُر امن تصفیے اور دو ریاستی حل کے نفاذ سے متعلق اعلیٰ سطحی بین الاقوامی کانفرنس کے دوبارہ انعقاد کا کہا گیا تھا۔اس زبانی قرارداد کے منظور ہونے کے بعد اسرائیل اور امریکا دونوں نے اس کی مخالفت کی۔

(جاری ہے)

ان کا کہنا تھا کہ اس کانفرنس کے دوبارہ شروع ہونے سے غزہ میں جنگ طویل ہو گی اور حماس کو تقویت ملے گی۔

اقوام متحدہ میں امریکی مشن کی نائب سیاسی مشیر تنگ وو نے کہا کہ ان کا ملک اس کانفرنس میں شریک نہیں ہو گا۔اقوام متحدہ کی جنرل اسمبلی کے اعلیٰ سطحی اجلاس کے دوران اس کانفرنس کے انعقاد سے زیادہ سے زیادہ سربراہانِ مملکت و حکومت کو اس تقریب میں شرکت کا موقع میسر آ سکے گا۔تا حال یہ واضح نہیں کہ فلسطینی صدر محمود عباس ذاتی طور پر اس کانفرنس میں شرکت کر سکیں گے یا نہیں، کیونکہ امریکا نے فلسطینی حکام پر ویزا پابندیاں عائد کر رکھی ہیں۔