Live Updates

پ*رائس ایکسپورٹرز نے پنجاب کی چاول کی فصل کے نقصان کی حد واضح کر دی

پیر 8 ستمبر 2025 19:55

لاہور(اُردو پوائنٹ اخبارتازہ ترین - آن لائن۔ 08 ستمبر2025ء) رائس ایکسپورٹرز ایسوسی ایشن آف پاکستان نے حالیہ سیلاب کے باعث چاول کی فصلوں کو لاحق نقصان کے مبینہ تاثر کی سختی سے تردید کرتے ہوئے کہا ہے کہ پنجاب میں چاول کی پیداوار پر صرف 10 تا 12 فیصد اثر پڑے گا۔ایسوسی ایشن کے سینئر نائب چیئرمین جاوید جیلانی نے بتایا کہ ایسوسی ایشن کے تخمینے کے مطابق پنجاب میں زیادہ سے زیادہ 6 سے 7 لاکھ ایکڑ اراضی متاثر ہوئی ہے، جس سے صوبے کی مجموعی چاول کی پیداوار پر محدود اثر پڑے گا۔

جاوید جیلانی نے واضح کیا کہ یہ اعداد و شمار سرکاری اور غیر سرکاری دونوں سرویز سے مطابقت رکھتے ہیں اور 60 فیصد نقصان کے دعووں کو یکسر مسترد کرتے ہیں۔ انہوں نے کہا کہ اگرچہ کئی علاقوں میں سیلاب نے نقصان پہنچایا، لیکن زائد پانی بعض علاقوں میں فائدہ مند ثابت ہو سکتا ہے، جہاں پہلے پانی کی کمی تھی اور فی ایکڑ پیداوار بہتر ہونے کا امکان ہے۔

(جاری ہے)

بین الاقوامی منڈی کے حوالے سے انہوں نے خبردار کیا کہ بھارت اس وقت کم قیمت پر چاول فروخت کر رہا ہے اور پاکستان کی فصل کے بارے میں منفی اور غلط رپورٹس غیر ملکی خریداروں کو پریشان کر سکتی ہیں۔ جاوید جیلانی نے کہا کہ ایسی غلط معلومات سے شکوک پیدا ہو سکتے ہیں کہ آیا پاکستانی برآمدکنندگان اپنے وعدے پورے کر سکیں گے یا نہیں، اس لیے ضروری ہے کہ صرف درست اور تصدیق شدہ معلومات ہی شیئر کی جائیں۔انہوں نے مزید کہا کہ پنجاب میں پانی کی سطح تیزی سے کم ہو رہی ہے اور امید ہے کہ سندھ بھی سیلابی پانی کو محفوظ طریقے سے سنبھال لے گا۔ رائس ایکسپورٹرز ایسوسی ایشن کے ارکان متاثرہ خاندانوں اور کسانوں کے ساتھ کھڑے ہیں اور جہاں ضرورت ہو گی امداد و تعاون فراہم کریں گے۔