عالمی منڈی میں خام تیل کے نرخوں میں اضافے کا رجحان

منگل 9 ستمبر 2025 11:59

نیویارک (اُردو پوائنٹ اخبارتازہ ترین - اے پی پی۔ 09 ستمبر2025ء) عالمی منڈی میں خام تیل کے نرخوں میں اضافے کا رجحان رہا جس کی وجہ اوپیک پلس کا توقع سے کم پیداوار بڑھانے کا فیصلہ اور روس پر ممکنہ نئی پابندیوں کے خدشات ہیں۔منگل کو عالمی منڈی میں کاروباری سرگرمیوں کے دوران برینٹ کروڈ آئل 35 سینٹ یا 0.53 فیصد بڑھ کر 66.37 ڈالر فی بیرل ہو گیا جبکہ امریکی ویسٹ ٹیکساس انٹرمیڈیٹ 32 سینٹ یا 0.51 فیصد اضافے سے 62.58 ڈالر فی بیرل پر پہنچ گیا۔

رائٹرز کے مطابق اوپیک اور اس کے اتحادی ممالک اوپیک پلس کے آٹھ رکن ممالک نے اتوار کو اعلان کیا کہ اکتوبر سے پیداوار میں 137,000 بیرل یومیہ اضافہ کیا جائے گا۔ یہ اضافہ ستمبر اور اگست کے ماہانہ اضافے ، جولائی و جون کے اعداد وشمار اور ماہرین کی توقعات سے بھی کم ہے۔

(جاری ہے)

ہائیتونگ سیکیورٹیز کے مطابق اس سال اوپیک پلس کی تیز پیداواری رفتار اور عالمی طلب کے اندازوں سے کم رہنے کے باعث منڈی میں خام تیل کی اضافی رسد بنیادی عنصر بنی ہوئی ہے جو قیمتوں پر دباؤ ڈالتی ہے۔

ادھر روس کے سب سے بڑے فضائی حملے میں یوکرین کے دارالحکومت کیف کی ایک سرکاری عمارت کو آگ لگنے کے بعد ماسکو پر مزید پابندیوں کے امکانات بھی قیمتوں میں اضافے کا باعث بنے۔امریکی صدر ڈونلڈ ٹرمپ نے کہا کہ وہ نئی پابندیوں کے دوسرے مرحلے پر جانے کو تیار ہیں۔ یورپی یونین کے اعلیٰ پابندیوں کے عہدیدار ایک وفد کے ہمراہ واشنگٹن پہنچے تاکہ روس کے خلاف پہلی مرتبہ مربوط ٹرانس اٹلانٹک اقدامات پر بات چیت ہو سکے۔مزید پابندیوں سے روسی تیل کی عالمی سپلائی کم ہو سکتی ہے جس سے قیمتوں میں مزید اضافہ ممکن ہے۔