چیئرمین سینیٹ سید یوسف رضا گیلانی سے سیکرٹری جنرل بین الپارلیمانی سپیکرز کانفرنس کی ملاقات، علاقائی پارلیمانی تعاون کو فروغ دینے پر زور

منگل 9 ستمبر 2025 23:17

اسلام آباد (اُردو پوائنٹ اخبارتازہ ترین - اے پی پی۔ 09 ستمبر2025ء) چیئرمین سینیٹ سید یوسف رضا گیلانی سے بین الپارلیمانی سپیکرز کانفرنس (آئی ایس سی ) کے سیکرٹری جنرل ایک ناتھ دھاکل نے ان کی رہائش گاہ پر ملاقات کی۔ ملاقات میں نومبر میں منعقد ہونے والی بین الپارلیمانی سپیکر کانفرنس کے متعلق امور اور اس کے ایجنڈے پر تفصیلی تبادلہ خیال کیا گیا۔

منگل کوسینیٹ سیکرٹریٹ سے جاری بیان کے مطابق چیئرمین سینیٹ نے زور دیا کہ کانفرنس کو زیادہ مؤثر اور نتیجہ خیز بنایا جائے تاکہ کانفرنس خطے اور عوام کے لئے عملی اور مثبت نتائج فراہم کرسکے۔ انہوں نے کہا کہ خطے کو اس وقت کئی سنگین چیلنجز درپیش ہیں جن میں ماحولیاتی بحران، غربت میں کمی اور پائیدار ترقی شامل ہیں، ان مسائل کے حل کے لئے علاقائی پارلیمانوں کے درمیان بامعنی تعاون اور مشترکہ حکمتِ عملی اپنانا وقت کی اہم ضرورت ہے۔

(جاری ہے)

سید یوسف رضا گیلانی نے واضح کیا کہ نومبر میں منعقد ہونے والی کانفرنس کا مقصد پارلیمانی اداروں کے مابین کثیرالجہتی تعاون کو فروغ دینا ہے تاکہ مکالمے کو آگے بڑھایا جاسکے، جامع پالیسی سازی کو ممکن بنایا جائے اور مشترکہ چیلنجز کا مقابلہ اجتماعی کوششوں سے کیا جاسکے۔اس موقع پر سیکرٹری جنرل بین الپارلیمانی سپیکرز کانفرنس ایک ناتھ دھاکل نے ایوان بالا کے ساتھ قریبی رابطہ اور تعاون جاری رکھنے کے عزم کا اظہار کیا۔ انہوں نے کہا کہ نومبر کی کانفرنس کو کامیاب بنانے کے لئے پاکستان کے ساتھ اشتراکِ عمل انتہائی اہم ہوگا۔ملاقات کے دوران اس عزم کا اعادہ کیا گیا کہ خطے کے پارلیمانی قائدین مشترکہ ترقی، پائیدار مستقبل اور عوامی خوشحالی کے لئے متحد ہو کر آگے بڑھیں گے۔