بطور وزیرِاعظم اور اب بطور چیئرمین سینیٹ ذاتی کاوش ہمیشہ رہی ہے کہ جنوب-جنوب تعاون کو فروغ دیا جائے‘چیئرمین سینٹ

اسلام آباد(اُردو پوائنٹ اخبارتازہ ترین - آن لائن۔ 09 ستمبر2025ء)چیئرمین سینیٹ سید یوسف رضا گیلانی نے کہا ہے کہ گرینڈ ایتھوپین رینیسانس ڈیم محض کنکریٹ اور اسٹیل کا ڈھانچہ نہیں بلکہ یہ ایتھوپیا کے عزم، اجتماعی وژن اور ترقی خوشحالی کی علامت ہے‘بطور وزیرِاعظم اور اب بطور چیئرمین سینیٹ ان کی ذاتی کاوش ہمیشہ یہی رہی ہے کہ جنوب-جنوب تعاون کو فروغ دیا جائے۔

اسلام آباد کے مقامی ہوٹل میں ایتھوپیا کے قومی دن پر نئے سال، یومِ اتحاد اور عظیم ایتھوپین رینیسانس ڈیم (GERD) کی افتتاحی تقریب سے بطور مہمان خصوصی سے خطاب کرتے ہوئے سید یوسف رضا گیلانی نے پاکستان اور ایتھوپیا کے تاریخی تعلقات کو مزید مستحکم کرنے کے عزم کا اعادہ کیا۔چیئرمین سینیٹ نے اپنے خطاب میں کہا:''گرینڈ ایتھوپین رینیسانس ڈیم محض کنکریٹ اور اسٹیل کا ڈھانچہ نہیں بلکہ یہ ایتھوپیا کے عزم، اجتماعی وژن اور ترقی خوشحالی کی علامت ہے۔

(جاری ہے)

''انہوں نے ایتھوپیا کی شاندار کامیابیوں کو خراجِ تحسین پیش کیا اور زور دیا کہ دونوں ممالک باہمی وسائل کے دانشمندانہ استعمال سے خوشحالی کے نئے دروازے کھول سکتے ہیں۔چیئرمین سینیٹ نے کہا کہ پاکستان اور ایتھوپیا کے درمیان صدیوں پرانے تجارتی و ثقافتی روابط ہیں جو پاکستان کی ''لُک افریقہ پالیسی'' کے تحت نئے جوش و جذبے کے ساتھ فروغ پا رہے ہیں۔

انہوں نے یاد دلایا کہ بطور وزیرِاعظم اور اب بطور چیئرمین سینیٹ ان کی ذاتی کاوش ہمیشہ یہی رہی ہے کہ جنوب-جنوب تعاون کو فروغ دیا جائے۔ اسی مقصد کے تحت سینیٹ نے رواں سال خصوصی اجلاس منعقد کیا تھا جسے پاکستان-افریقہ فرینڈشپ ڈے کے طور پر منایا گیا۔انہوں نے کہا کہ ترقی پذیر ممالک کو درپیش مسائل بشمول پانی و توانائی کا تحفظ، نوجوانوں کا بااختیار بنانا اور ادارہ جاتی مضبوطی کا حل باہمی اتحاد اور گلوبل ساؤتھ کے درمیان تعاون میں پوشیدہ ہے۔

اس موقع پر انہوں نے نومبر 2025 میں اسلام آباد میں منعقد ہونے والی انٹرپارلیمنٹری اسپیکرز کانفرنس (ISC) کا بھی ذکر کیا اور اس میں ایتھوپیا کے پارلیمانی رہنماؤں کو خوش آمدید کہنے کی خواہش ظاہر کی۔چیئرمین سینیٹ نے مزید کہا کہ پاکستان اور ایتھوپیا کا مقصد ایک ہی ہے کہ اپنے ہر شہری کے لیے امن، خوشحالی اور وقار کو یقینی بنایا جاے۔ مستقبل کے تناظر میں انہوں نے تجدیدی توانائی، زرعی جدت اور پارلیمانی روابط کے شعبوں میں قریبی شراکت داری کی امید ظاہر کی۔

اپنے خطاب کے اختتام پر سید یوسف رضا گیلانی نے پاکستان اور ایتھوپیا کے عوامی تعلقات کو مزید مضبوط بنانے میں ایتھوپیا کے سفیر ڈاکٹر جمال بیکر عبداللہ کی خدمات کو سراہا اور بھرپور خراج تحسین پیش کیا۔ اس موقع پر وفاقی جمہوریہ ایتھوپیا کے پاکستان میں سفیر ڈاکٹر جمال بیکر عبداللہ نے بھی خطاب کیا اور پاکستان-افریقہ تعلقات کے فروغ میں چیئرمین سینیٹ سید یوسف رضا گیلانی کی وژنری قیادت کو خراجِ تحسین پیش کیا۔

انہوں نے پاکستان اور ایتھوپیا کے تاریخی تعلقات کو اجاگر کرتے ہوئے کہا کہ یہ رشتہ امن، تنوع اور باہمی احترام کی مشترکہ اقدار پر قائم ہے۔سفیر نے تجارت، ماحولیاتی تبدیلی کے مقابلے کی صلاحیت، ٹیکنالوجی اور بین المذاہب ہم آہنگی جیسے شعبوں میں بڑھتے ہوئے تعاون کی اہمیت پر زور دیا۔ انہوں نے کہا کہ ایتھوپیا پاکستان کی ''لُک افریقہ پالیسی'' کے تحت ادارہ جاتی شراکت داری اور باضابطہ مکالمے کے ذریعے دوطرفہ تعلقات کو مزید مستحکم کرنے میں بھرپور دلچسپی رکھتا ہے۔