آذربائیجان کے تعاون سے وفاقی دارالحکومت میں آسان خدمت مرکز کے قیام کا معاہدہ، مرکز کے قیام سے عوام کو کئی

اسلام آباد (اُردو پوائنٹ اخبارتازہ ترین - اے پی پی۔ 10 ستمبر2025ء) وزیراعظم محمد شہباز شریف نے آذربائیجان کی سٹیٹ ایجنسی فار پبلک سروس اینڈ سوشل انوویشن(ایس اے پی ایس ایس آئی) کے تعاون سے وفاقی دارالحکومت میں آسان خدمت مرکز کے قیام کو پاکستان اور آذربائیجان کے مابین دوستی کا نیا سنگ میل قرار دیتے ہوئے کہا ہے کہ اس مرکز کے قیام سے عوام کو کئی محکموں کی خدمات ایک ہی چھت تلے دستیاب ہوں گی۔

ان خیالات کا اظہار انہوں نے بدھ کو سٹیٹ ایجنسی فار پبلک سروس اینڈ سوشل انوویشن، آذر بائیجان اور وزارت انفارمیشن ٹیکنالوجی و ٹیلی کام کے مابین اسلام آباد میں آسان خدمت مرکز کے قیام کے حوالے سے معاہدے پر دستخطوں کی تقریب کے موقع پر گفتگو کرتے ہوئے کیا۔ وزیراعظم آفس کے میڈیا ونگ کی طرف سے جاری بیان کے مطابق وزیراعظم محمد شہباز شریف سے آذربائیجان کی سٹیٹ ایجنسی فار پبلک سروس اینڈ سوشل انوویشن(ایس اے پی ایس ایس آئی)کے چیئرمین الووی مہدییو نے ملاقات کی۔

(جاری ہے)

اس موقع پر نائب وزیر اعظم و وزیر خارجہ اسحاق ڈار ، وفاقی وزیر منصوبہ بندی احسن اقبال ، وفاقی وزیر اقتصادی امور احد خان چیمہ، وفاقی وزیر ہائوسنگ ریاض حسین پیرزادہ، وفاقی وزیر اطلاعات و نشریات عطاء اللہ تارڑ، وفاقی وزیر انفارمیشن ٹیکنالوجی و ٹیلی کام شزا فاطمہ اور متعلقہ اعلیٰ سرکاری افسران بھی موجود تھے۔ وزیراعظم نے پاکستان اور آذربائیجان کے مابین اس معاہدہ کو دوستی کا نیا سنگ میل قرار دیتے ہوئے کہا کہ ایس اے پی ایس ایس آئی کے اشتراک سے اسلام آباد میں آسان خدمت مرکز قائم کیا جائے گا۔

وزیراعظم نے اپنے دورہ آذربائیجان کے دوران باکو میں آسان خدمت مرکز کا دورہ کیا تھا جس کے بعد انہوں نے اسلام آباد میں اسی طرز پر آسان خدمت مرکز قائم کرنے اور اس حوالے سے آذربائیجان سے تعاون حاصل کرنے کی ہدایت کی تھی۔ وزیراعظم نے کہا کہ آسان خدمت مرکز کے قیام سے اسلام آباد کے شہریوں کو کئی محکموں کی خدمات ایک ہی چھت تلے دستیاب ہوں گی ، شہریوں کی خدمت پر مبنی یہ خدمت مرکز شہری سہولیات کے ضمن میں ایک انقلابی قدم ہوگا۔

وزیر اعظم نے ہدایت کی کہ آسان خدمت مرکز کے لئے شفاف اور میرٹ پر تعیناتیاں کی جائیں ۔ انہوں نے بزنس سہولت مرکز اور آسان خدمت مرکز کو ضم کرنے کے حوالے سے بھی حکمت عملی تشکیل دینے کی ہدایت کی۔ انہوں نے کہا کہ آسان خدمت مرکز حکومت کی کیش لیس معیشت پالیسی کو آگے بڑھانے میں مددگار ثابت ہو گا ۔ انہوں نے کہاکہ اسلام آباد میں آسان خدمت مراکز کا دائرہ کار مزید شہروں میں بھی پھیلایا جائے گا۔

وزیر اعظم نے آذربائیجان کے صدر الہام علیوف اور آذربائیجان کی حکومت کا شکریہ ادا کیا جنہوں نے اس منصوبے کے لئے اپنی خدمات پیش کیں اور ماہرانہ رائے اور نگرانی فراہم کی۔ انہوں نے کہا کہ اس منصوبے کی تکمیل سے دونوں ممالک کے درمیان معاشی تعاون کو مزید فروغ ملے گا۔ بیان کے مطابق آذربائیجان کی سٹیٹ ایجنسی فار پبلک سروس اینڈ سوشل انوویشن(ایس اے پی ایس ایس آئی) اور وزارت انفارمیشن ٹیکنالوجی و ٹیلی کام کے درمیان اسلام آباد میں آسان خدمت مرکز کے قیام کے حوالے سے معاہدے پر بھی دستخط ہوئے ، وزیر اعظم محمد شہباز شریف نے بھی تقریب میں شرکت کی۔