Live Updates

کراچی میں جام گوٹھ ملیر کے مقام پر شاہراہ بھٹو سیلاب میں بہہ گئی

کراچی میں بارش برسنے اور تھڈو ڈیم بھرنے کے بعد کراچی کی ملیر اور لیاری ندیاں بپھر گئیں، پانی اطراف کی آبادیوں میں داخل

بدھ 10 ستمبر 2025 22:01

کراچی (اُردو پوائنٹ اخبارتازہ ترین - این این آئی۔ 10 ستمبر2025ء)کراچی کے علاقے جام گوٹھ ملیر کے مقام پر شاہراہ بھٹو سیلاب میں بہہ گئی۔پانی ملیر ندی کے درمیان تعمیر ہونے والی شاہراہ بھٹو کو کاٹ کر دوسری جانب نکل گیا۔علاقہ مکین کا کہنا ہے کہ ملیر ندی کے اندر شاہراہ بھٹو کی تعمیر کی وجہ سے پانی گزرنے کی جگہ تنگ ہو گئی ہے۔کراچی میں بارش برسنے اور تھڈو ڈیم بھرنے کے بعد کراچی کی ملیر اور لیاری ندیاں بپھر گئیں، پانی اطراف کی آبادیوں میں داخل ہوگیا، متعدد افراد کے پھنسے ہونے کی اطلاعات پر ریسکیو آپریشن جاری ہے۔

تھڈو ڈیم کا سیلابی پانی اسکیم 33 کے رہائشی علاقوں میں داخل ہوگیا۔لیاری ندی میں بھی طغیانی کے باعث ایف بی ایریا، شفیق کالونی، حسن نعمان کالونی، سہراب گوٹھ، لیاری بکرا پیڑی کے قریب بھی ندی کا پانی گھروں میں داخل ہو گیا، کئی فٹ پانی جمع ہونے سے لوگ گھروں میں محصور ہوگئے۔

(جاری ہے)

کشتیوں سے ریسکو آپریشن جاری ہے، گلشن اقبال کیقریب لیاری ندی میں پھنسے 2 افراد کو بحفاظت نکال لیا گیا۔

ترجمان وزیراعلیٰ سندھ کے مطابق تھڈو ڈیم میں پانی کی سطح بلند ہونے سے پانی ایم نائن سے ٹکرا گیا، جمالی پل کے قریب ایم نائن پانی سے بھر گیا۔انہوں نے کہا کہ سندھ حکومت نے ایم نائن کی بیچ کی دیوار توڑ کر پانی کو راستہ دینے کا فیصلہ کیا ہے۔کورنگی کازوے پر پانی کا تیز بہاؤ ہونے کی وجہ سے گودام چورنگی تا محمود آباد روڈ بند کر دیا گیا ہے۔ٹریفک پولیس کے مطابق ٹریفک کو گودام چورنگی سے جام صادق برج کی طرف بھیجا جا رہا ہے،ٹریفک کو محمود آباد سے ایکسپریس وے قیوم آباد کی طرف بھیج رہے ہیں۔اس کے علاوہ قیوم آباد سے کورنگی کراسنگ جانے والی سڑک بھی بند ہے۔ ٹریفک کو قیوم آباد سے گودام چورنگی کی طرف بھیجا جا رہا ہے۔