دیوان گروپ کا پنجاب کے اقتصادی زون میں الیکٹرک وہیکلز کا اسیمبلنگ پلانٹ لگانے کا عندیہ

کراچی میں مختلف قسم کی گاڑیاں تیار کررہے ہیں، اب پنجاب میں بھی صنعتی یونٹ لگانا چاہتے ہیں، کوشش ہےکہ الیکٹرک وہیکلز کے اسمبلنگ اور مینوفیکچرنگ کے کارخانے لگیں۔ صوبائی وزیرچوہدری شافع حسین

ثنااللہ ناگرہ جمعرات 11 ستمبر 2025 19:31

دیوان گروپ کا پنجاب کے اقتصادی زون میں الیکٹرک وہیکلز کا اسیمبلنگ پلانٹ ..

لاہور (اُردو پوائنٹ اخبارتازہ ترین۔ آئی پی اے نیوزایجنسی۔ 11 ستمبر 2025ء) صوبائی وزیرصنعت و تجارت چوہدری شافع حسین سے دیوان گروپ کے سی ای او وسیم الحق کی قیادت میں وفد نے ملاقات کی۔پیسک ہاؤس میں ہونے والی ملاقات میں پنجاب کے سپیشل اکنامک زونز میں سرمایہ کاری کے مواقع پر بات چیت ہوئی۔ دیوان گروپ نے پنجاب کے خصوصی اقتصادی زون میں الیکٹرک وہیکلز کا اسیمبلنگ پلانٹ لگانے کا عندیہ دے دیا۔

اس موقع پر سی ای او دیوان گروپ وسیم الحق نے کہاکہ ہمارا گروپ کراچی میں مختلف قسم کی گاڑیاں تیار کر رہا ہے۔ پنجاب میں بھی اپنا صنعتی یونٹ لگانا چاہتے ہیں۔ صوبائی وزیر صنعت و تجارت چوہدری شافع حسین نے اس موقع پر گفتگو کرتے ہوئے کہا کہ وزیر اعلیٰ پنجاب کا فوکس صوبے میں ای وی سیکٹر کا فروغ ہے۔

(جاری ہے)

متعدد غیر ملکی کمپنیوں نے پنجاب کے الیکٹرک وہیکلز سیکٹر میں سرمایہ کاری پر آمادگی ظاہر کی ہے۔

متعدد غیر ملکی کمپنیاں پنجاب میں تیزی سے کار خانے لگا رہی ہیں۔کوشش ہے کہ یہاں الیکٹرک وہیکلز کے اسمبلنگ اور مینوفیکچرنگ کے کارخانے لگیں۔چوہدری شافع حسین نے کہا کہ الیکٹرک گاڑیاں موسمیاتی تبدیلیوں کے اثرات سے بچنے اور ماحولیاتی آلودگی پر قابو پانے میں مؤثر کردار ادا کرسکتی ہیں۔ دیوان گروپ پنجاب میں کسی بھی سپیشل اکنامک زون میں الیکٹرک وہیکلز کا اسمبلنگ پلانٹ لگا سکتا ہے۔

صنعتی یونٹ لگانے کیلئے سپیشل اکنامک زون میں قابل توسیع 30 سال کی لیز پر اراضی حاصل کی جاسکتی ہے۔ صوبائی وزیر صنعت و تجارت چوہدری شافع حسین نے کہاکہ دیوان گروپ پنجاب میں وہیکلز کا اسمبلنگ پلانٹ لگائے، ہرممکن سہولت دیں گے۔

چاہتے ہیں کہ پنجاب میں ای وی چارجنگ کے اسیمبلنگ پلانٹ بھی لگیں۔ صوبائی وزیرصنعت و تجارت نے دیوان گروپ کی تیار کردہ گاڑیوں کا مشاہدہ کیا،گاڑی خود ڈرائیو کرکے جائزہ لیا۔

پنجاب سرمایہ کاری بورڈ کے ڈائریکٹر ڈاکٹر عمران ہاشمی بھی ملاقات میں موجود تھے۔وفد میں دیوان گروپ کے ڈائریکٹر،سیلز مینجر،سروس مینجر اور گروپ کے دیگر حکام بھی شامل تھے۔