Live Updates

پنجاب حکومت کی انتظامیہ کی نااہلی، سیلابی پانی سے کروڑوں روپے کی گندم خراب ہو گئی

سیلاب کی وارننگز کے باوجود سرکاری گوداموں سے گندم منتقل نہ کی گئی، سرکاری گندم کے ذخائر خراب ہونے سے مارکیٹ میں گندم مزید مہنگی ہونے کا خدشہ

محمد علی جمعرات 11 ستمبر 2025 19:52

مظفرگڑھ ( اُردو پوائنٹ اخبارتازہ ترین۔ 11 ستمبر2025ء ) پنجاب حکومت کی انتظامیہ کی نااہلی، سیلابی پانی سے کروڑوں روپے کی گندم خراب ہو گئی، سیلاب کی وارننگز کے باوجود سرکاری گوداموں سے گندم منتقل نہ کی گئی، سرکاری گندم کے ذخائر خراب ہونے سے مارکیٹ میں گندم مزید مہنگی ہونے کا خدشہ۔ تفصیلات کے مطابق مظفر گڑھ میں گندم کے سرکاری ذخائر سیلاب کے پانی کی وجہ سے خراب ہو جانے کا انکشاف ہوا ہے ۔

میڈیا رپورٹس کے مطابق سیلابی پانی پاکستان ایگریکلچرل اسٹوریج اینڈ سروس کارپوریشن لمیٹڈ (پاسکو) کے گودام میں داخل ہوگیا۔ گودام میں سیلابی پانی داخل ہونے کے باعث کروڑوں روپے مالیت کی گندم خراب ہوگئی۔ سوال اٹھایا جا رہا ہے کہ سیلاب کی پیشگی وارننگز کے باوجود گندم کے ذخائر کو محفوظ مقام پر کیوں منتقل نہیں کیا گیا؟۔

(جاری ہے)

دوسری جانب پنجاب میں گندم کے ذخائر میں خطرناک حد تک کمی ہو جانے کا انکشاف ہوا ہے۔

پنجاب میں گندم کے ذخائر خطرناک حد تک کم ہو گئے ہیں اور سرکاری سطح پر 14 لاکھ ٹن کا شارٹ فال پیدا ہو چکا ہے۔ آئندہ سات ماہ کے دوران صوبے کو مجموعی طور پر 42 لاکھ ٹن گندم کی ضرورت ہے جبکہ فی الحال صرف 29 لاکھ ٹن گندم دستیاب ہے۔اعدادوشمار کے مطابق حکومت کے پاس محض 8 لاکھ 90 ہزار ٹن گندم کے سرکاری ذخائر موجود ہیں، جبکہ باقی ضرورت نجی شعبے اور شناخت شدہ ذخائر پر منحصر ہے، جو کسی بھی وقت غیر یقینی صورتحال پیدا کر سکتے ہیں۔

محکمہ خوراک نے گندم کی قلت پر قابو پانے کے لیے پاسکو (پاکستان ایگریکلچر اسٹوریج اینڈ سروسز کارپوریشن) سے 14 لاکھ ٹن گندم حاصل کرنے کی تجویز دی ہے۔ اس کے ساتھ ہر ماہ صوبے کے ڈویژنل ہیڈکوارٹرز میں ایک لاکھ ٹن سرکاری گندم جاری کرنے کی پالیسی بھی زیر غور ہے تاکہ سپلائی چین کو برقرار رکھا جا سکے۔ذرائع نے بتایا ہے کہ خیبرپختونخوا کو بھی نجی ذخائر سے ہر ماہ ایک لاکھ ٹن گندم فراہم کرنے کا منصوبہ زیر غور ہے، جس سے پنجاب کے وسائل پر مزید دباؤ پڑنے کا خدشہ ہے۔ اگر پاسکو سے ذخائر بروقت نہ ملے تو پنجاب میں آٹے اور گندم کی قیمتوں میں شدید اضافہ ہو سکتا ہے، جو مارکیٹ میں سنگین بحران کا سبب بنے گا۔