ٹریفک پولیس لورالائی کا بغیر دستاویز پبلک ٹرانسپورٹ کے خلاف کریک ڈائون، متعدد گاڑیوں کو جرمانے کئے گئے

جمعرات 11 ستمبر 2025 19:40

کوئٹہ (اُردو پوائنٹ اخبارتازہ ترین - اے پی پی۔ 11 ستمبر2025ء) ٹریفک پولیس لورالائی نے بغیر دستاویز پبلک ٹرانسپورٹ کے خلاف کریک ڈائون کرتے ہوئے متعدد گاڑیوں کو جرمانے کئے ۔کمشنر/ چیئرمین ریجنل ٹرانسپورٹ اتھارٹی لورالائی ڈویژن کی خصوصی ہدایت پر اور سیکرٹری ریجنل ٹرانسپورٹ اتھارٹی لورالائی ڈویژن امیر محمد مندوخیل، ایکسائز افسر جمیل کاکڑ اور ٹریفک پولیس انچارج لورالائی منظور حسنی کی نگرانی میں لورالائی تا کوئٹہ روٹ پر پبلک ٹرانسپورٹ گاڑیوں کے خلاف مشترکہ کارروائی عمل میں لائی گئی۔

کارروائی میں ریجنل ٹرانسپورٹ اتھارٹی، ایکسائز پولیس اور ٹریفک پولیس کے افسران اور اہلکاروں نے حصہ لیا۔ اس دوران پبلک کیرئیر وہیکلز کے روٹ پرمٹس، گاڑیوں کی فٹنس، کرایہ نامہ، ڈرائیور لائسنس، رجسٹریشن و دیگر قانونی کاغذات کی جانچ پڑتال کی گئی، جبکہ مشہور بین الصوبائی ٹرانسپورٹ کمپنی ڈائیوو کی بسوں کے خفیہ خانوں کی بھی خصوصی چیکنگ کی گئی۔

(جاری ہے)

کارروائی کے دوران متعدد گاڑیاں ایسی پائی گئیں جن کے پاس مطلوبہ دستاویزات موجود نہ تھیں۔ متعلقہ ڈرائیورز اور گاڑی مالکان کو موقع پر ہی قانون کے مطابق جرمانے عائد کیے گئے۔سیکرٹری آر ٹی اے امیر محمد مندوخیل نے اس موقع پر کہا کہ ریجن بھر میں پبلک ٹرانسپورٹ کے نظام کو بہتر بنانے، عوام کو محفوظ اور معیاری سفری سہولیات فراہم کرنے کے لیے یہ اقدامات جاری رہیں گے۔ انہوں نے کہا کہ قانون کی خلاف ورزی کرنے والے عناصر کے ساتھ کسی قسم کی نرمی نہیں برتی جائے گی۔عوامی حلقوں نے اس کارروائی کو سراہا ہے اور امید ظاہر کی ہے کہ اس سے نہ صرف سفری سہولیات میں بہتری آئے گی بلکہ سڑکوں پر قانون کی عملداری بھی مضبوط ہوگی۔