ضلع ڈوڈہ میں چوتھے روز بھی سخت پابندیاں برقرار، معمولات زندگی مفلوج

جمعہ 12 ستمبر 2025 12:03

جموں (اُردو پوائنٹ اخبارتازہ ترین - اے پی پی۔ 12 ستمبر2025ء) بھارت کے غیر قانونی زیر تسلط جموں و کشمیر کے ضلع ڈوڈہ میں رکن قانون ساز اسمبلی معراج ملک کی گرفتاری کے خلاف ہونے والے احتجاجی مظاہروں کو روکنے کیلئے عائد کی جانی والی سخت پابندیوں کا سلسلہ چوتھے روز بھی جا ری ہے۔کشمیرمیڈیاسروس کے مطابق نئی دہلی کے مسلط کردہ لیفٹیننٹ گورنر کے ماتحت انتظامیہ نے ضلع کے علاقوں بھلےسا، کہارا اور چلی پنگل میں انٹرنیٹ اور موبائل فون سروسز معطل کر رکھی ہیں۔

(جاری ہے)

پولیس نے عام آدمی پارٹی سے وابستہ رکن اسمبلی معراج ملک کی گرفتاری کے خلاف احتجاج کے دوران خواتین سمیت 8 افراد کو گرفتار کر لیا ہے۔ مظاہروں کو روکنے کے لئے بڑی تعداد میں پولیس اور بھارتی پیرا ملٹری اہلکار تعینات کئے گئے ہیں۔ ڈوڈہ بھر میں 14ستمبر تک سکول بھی بند کیے گئے ہیں۔ پابندیوں کے باعث لوگ بنیادی اشیائے ضروریہ کی قلت کا شکار ہیں ۔ ٹھٹھری، گندوہ بھلیسہ، مرچ پنگل اور کہرہ کے علاقوں میں گزشتہ 3 روز سے بجلی کی فراہمی بھی معطل ہے۔ پورے ضلع ڈوڈہ میں معمولات زندگی مفلوج ہیں اور لوگ شدید مشکلات سے دوچار ہیں۔