شافع حسین سے پاکستان - حونان چیمبر آف کامرس کے وفد کی ملاقات،چین کی کمپنیوں کی پنجاب میں سرمایہ کاری پر بات چیت

جمعہ 12 ستمبر 2025 13:12

لاہور (اُردو پوائنٹ اخبارتازہ ترین - این این آئی۔ 12 ستمبر2025ء)صوبائی وزیر صنعت و تجارت چوہدری شافع حسین سے پاکستان - حونان چیمبر آف کامرس کے وفد نے ملاقات کی۔ پیسک ہاؤس میں ہونے والی ملاقات میں چین کی کمپنیوں کی پنجاب میں سرمایہ کاری پر بات چیت ہوئی۔صوبائی وزیر صنعت و تجارت چوہدری شافع حسین نے اس موقع پر گفتگوکرتے ہوئے کہاکہ پاکستان - حونان چیمبر آف کامرس اور محکمہ صنعت و تجارت کے مابین باہمی تعاون اور اشتراک کا معاہدہ موجود ہے۔

معاہدے پر عملدرآمد کے باعث چین کی کمپنیاں پنجاب میں سرمایہ کاری کے لئے آرہی ہیں۔چوہدری شافع حسین نے کہاکہ حونان چیمبر آف کامرس چین کی ٹیکسٹائل انڈسٹری کی یہاں منتقلی کے لئے سہولت کاری کرے۔حکومت چین کی سرمایہ کار کمپنیوں کو سپیشل اکنامک زونز میں زمین کی فراہمی کے ساتھ ہرممکن سہولیات دے گی۔

(جاری ہے)

چین کی انڈسٹری کی پنجاب منتقلی سے مقامی لوگوں کو روزگار ملے گا اور چین کی ٹیکنالوجی ٹرانسفر ہوگی۔

وزیرصنعت و تجارت پنجاب نے کہاکہ چین کی سرمایہ کار کمپنیوں کیلئے ای وی سیکٹر ،پیٹ فیڈ انڈسٹری ،زراعت،سیاحت، لائیوسٹاک اور دیگر شعبوں میں سرمایہ کاری کے وسیع مواقع موجود ہیں۔ پاکستان میں ابھی تک ای وی چارجنگ اسیمبلنگ کا ایک بھی پلانٹ موجود نہیں ہے۔پنجاب میں ای وی چارجنگ کا ایسمبلنگ پلانٹ لگانے کا بہترین وقت ہے۔چوہدری شافع حسین نے کہاکہ حونان چیمبر آف کامرس چین کی کمپنیوں کو یہاں ای وی چارجنگ اسیمبلنگ پلانٹ لگانے کے حوالے آگاہ کرے۔

چین کی کمپنیوں کی پنجاب میں سرمایہ کاری سے پاکستان اور چین کے معاشی تعلقات مضبوط ہورہے ہیں۔چین کی مزید کمپنیوں کی پنجاب میں سرمایہ کاری کا خیر مقدم کریں گے اور ہرممکن سہولت دیں گے۔وفد حونان چیمبر آف کامرس نے کہاکہ آئندہ چند دنوں میںچین کے بڑے سرمایہ کار گروپ پنجاب کا دورہ کریں گے اور یہاں سرمایہ کاری کے مواقع کا جائزہ لیں گے۔وفد میں حونان چیمبر آف کامرس کے عہدیداران مسٹر نیکوچین ،مسٹر ہانگ اور دیگر شامل تھے۔پنجاب سرمایہ کاری بورڈ کے ڈائریکٹر ڈاکٹر عمران ہاشمی بھی ملاقات میں موجود تھے۔