پی آئی اے کا کینیڈا کے لیے اپنے فضائی آپریشن عارضی طور پر معطل کرنے کا فیصلہ

ہفتہ 13 ستمبر 2025 18:11

کراچی(اُردو پوائنٹ اخبارتازہ ترین - این این آئی۔ 13 ستمبر2025ء)پاکستان انٹرنیشنل ایئرلائنز (پی آئی ای)نے کینیڈا کے لیے اپنے فضائی آپریشن کو عارضی طور پر معطل کرنے کا فیصلہ کیا ہے۔پی آئی اے کے ترجمان کے مطابق یہ فیصلہ بحر الکاہل کو پار کرنے والے خصوصی بوئنگ 777 لانگ رینج طیاروں کی ضروری میٹیننس کے لیے کیا گیا ہے۔یہ طیارے 17 گھنٹے تک مسلسل پرواز کرنے کی صلاحیت رکھتے ہیں اور ان طیاروں کی مکمل تکنیکی معائنہ اور پرزہ جات کی تبدیلی کے عمل کو تین ہفتوں تک جاری رکھا جائے گا۔

(جاری ہے)

پی آئی اے کے مطابق یہ میٹیننس ہر دس سال بعد ضروری ہوتی ہے تاکہ طیارے کی مکمل فٹنس اور حفاظت کو یقینی بنایا جا سکے۔اس اقدام کا مقصد آنے والے مہینوں میں متوقع مسافروں کے رش سے پہلے طیاروں کو مکمل طور پر تیار کرنا ہے۔ پی آئی اے نے اپنے مسافروں کو ہونے والی زحمت کے لیے معذرت کی ہے، تاہم ایئرلائن نے اس بات پر زور دیا کہ مسافروں کی حفاظت اور طیاروں کی مکمل فٹنس اس کا اولین مقصد ہے۔ترجمان نے مزید کہا کہ پی آئی اے اپنے مسافروں کے سفر کو محفوظ اور آرام دہ بنانے کے لیے ہر ممکن اقدام اٹھا رہا ہے اور جیسے ہی طیاروں کی مرمت مکمل ہو گی، فضائی آپریشن دوبارہ شروع کر دیا جائے گا۔