وزیراعظم شہباز شریف کالوئر دیر میں فتنہ الہندوستان کے10 دہشت گردوں کوجہنم واصل کرنے پر سیکیورٹی فورسز کو خراج تحسین

ہفتہ 13 ستمبر 2025 21:40

اسلام آباد (اُردو پوائنٹ اخبارتازہ ترین - اے پی پی۔ 13 ستمبر2025ء) وزیر اعظم محمد شہباز شریف نے کہا ہے دہشت گردی کے خلاف جنگ میں سیکیورٹی فورسز سیسہ پلائی ہوئی دیوار کی طرح کھڑی ہیں،پوری قوم شہدا کو سلام پیش کرتی ہے۔ ہفتہ کو وزیر اعظم آفس کے میڈیا ونگ سے جاری بیان کے مطابق وزیراعظم محمد شہباز شریف نے خیبرپختونخوا کے ضلع لوئر دیر کے علاقے لال قلعہ میدان میں فتنہ الہندوستان کے دہشت گردوں کے خلاف کامیاب کارروائی پر سیکیورٹی فورسز کو خراج تحسین پیش کیا۔

(جاری ہے)

وزیراعظم نے آپریشن میں فتنہ الہندوستان کے 10 دہشت گردوں کو ہلاک کرنے پر سیکیورٹی فورسز کی پذیرائی کی۔وزیراعظم نے آپریشن میں دہشت گردوں کا بہادری سے مقابلہ کرتے ہوئے جام شہادت نوش کرنے والے سیکیورٹی فورسز کے 7 جوانوں کو خراج عقیدت پیش کیا اورشہدا کے بلندی درجات کیلئے دعا کی۔وزیراعظم نے شہدا کے اہل خانہ سے اظہار تعزیت کرتے ہوئے کہا کہ دہشت گردی کے خلاف جنگ میں سیکیورٹی فورسز سیسہ پلائی ہوئی دیوار کی طرح کھڑی ہیں،پوری قوم شہدا کو سلام پیش کرتی ہے،ملک سے ہر قسم کی دہشت گردی کے مکمل خاتمے کے لئے پر عزم ہیں۔