Live Updates

پاکستان اور بھارت کا دبئی میں بڑا میچ ، ٹکٹ 13 لاکھ روپے تک پہنچ گیا

آج کا میچ جیتنے والی ٹیم سپر فور میں رسائی حاصل کر لے گی

ذیشان مہتاب اتوار 14 ستمبر 2025 14:47

پاکستان اور بھارت کا دبئی میں بڑا میچ ، ٹکٹ 13 لاکھ روپے تک پہنچ گیا

لاہور (اردو پوائنٹ تازہ ترین اخبار ۔ 14 ستمبر 2025ء ) دنیائے کرکٹ کے دو سب سے بڑی حریف ایک بار پھر دبئی میں آمنے سامنے ہوں گے، پاکستان اور بھارت کے درمیان آج ٹی ٹونٹی ایشیا کپ کے گروپ اے کا میچ کھیلا جائے گا۔ پاکستان اور بھارت کی ٹیمیں 6 ماہ کے دوران دوسری بار آمنے سامنے ہوں گی، اس سے قبل دونوں ٹیموں نے چیمپئنز ٹرافی میں میچ کھیلا تھا۔

حالیہ کارکردگی کے لحاظ سے دونوں ٹیمیں بہترین فارم میں ہیں، بھارت نے ایشیا کپ میں متحدہ عرب امارات کے خلاف 9 وکٹوں سے فتح حاصل کی، پاکستان نے افغانستان اور یو اے ای کو شکست دے کر 3 ملکی سیریز اپنے نام کی۔ دبئی کے گرم موسم میں یہ میچ کھیلا جائے گا، جہاں دن کے وقت درجہ حرارت 41 ڈگری تک پہنچ جاتا ہے لیکن میچ کے دوران سورج غروب ہونے کے بعد درجہ حرارت 33 ڈگری سینٹی گریڈ تک ہوگا۔

(جاری ہے)

ایشیا کپ میں دونوں ٹیموں کا ریکارڈ بھی دلچسپ ہے، بھارت نے اب تک 19 میچوں میں سے 10 میں کامیابی حاصل کی جبکہ پاکستان نے 6 جیتے ہیں، پاکستان کی بھارت کے خلاف ایشیا کپ میں آخری فتح 2022 میں آئی تھی۔ بھارت 8 بار ایشیا کپ کا چیمپئن بن چکا ہے جبکہ پاکستان نے یہ اعزاز صرف 2 مرتبہ حاصل کیا ہے، میچ کے لیے پاکستانی ٹیم نے پریکٹس کے بجائے آرام کو ترجیح دی جبکہ بھارتی ٹیم نے ٹریننگ سیشن میں حصہ لیا۔

اس بڑے مقابلے کے ٹکٹس کی مانگ میں بدستوراضافہ ہورہا ہے، ٹکٹوں کی قیمت 40 ہزار روپے سے شروع ہوکر 13 لاکھ روپے تک جا پہنچی ہے۔ پاکستانی شائقین کرکٹ نے بھارت کے خلاف میچ سے بڑی اُمیدیں باندھ لی ہیں، اُن کا کہنا ہے کہ توقع ہے کہ پاکستانی ٹیم اچھا پرفارم کرے گی۔ دوسری طرف دبئی میں دونوں ٹیموں کا آخری مقابلہ ستمبر 2022ء میں ہوا تھا جب پاکستان نے محمد نواز کی آل راؤنڈ کارکردگی اور محمد رضوان کے 71 رنز کی بدولت 5 وکٹ سے کامیابی حاصل کر لی تھی، اس ٹیم میں شامل فخر زمان، خوشدل شاہ اور حارث رؤف ہی موجودہ اسکواڈ کا حصہ ہیں۔

ٹی ٹونٹی کے آخری میچ میں بھارت نے امریکا میں پاکستان کو شکست دی تھی، حالیہ دنوں میں گرین شرٹس نے اپنے آخری 14 میں سے 10 ٹی ٹونٹی انٹرنیشنل میچز میں فتح حاصل کی ہے، آج کا میچ جیتنے والی ٹیم سپر فور میں رسائی حاصل کر لے گی۔