غزہ کے معصوم بچوں کا خون ہمیں پکار رہا ہے ، اپنی آواز کو فلسطین کے مظلوم بچوں کی آواز بنا یا جائے ،منعم ظفر خان

کراچی(اُردو پوائنٹ اخبارتازہ ترین - این این آئی۔ 15 ستمبر2025ء)جماعت اسلامی کے تحت اسرائیلی جارحیت و دہشت گردی کے شکار اہل غزہ بالخصوص معصوم بچوں سے اظہار یکجہتی کے لیے جمعرات 18ستمبر کو صبح 10بجے شاہراہ قائدین پر ہونے والے ’’ کراچی چلڈرن غزہ مارچ ‘‘ کی تیاریاں تیزی سے جاری ہیں ، اسکولوں میں بڑے پیمانے پر رابطے کیے جارہے ہیں ، مارچ میں شہر بھر کے نجی و سرکاری اسکولوں کے طلبہ و طالبات بڑی تعداد میں شریک ہوں گے ، مارچ سے امیر جماعت اسلامی پاکستان حافظ نعیم الرحمن خصوصی خطاب کریں گے ۔

امیر جماعت اسلامی کراچی منعم ظفر خان کی جانب سے اسکولوں کے پرنسپلز اور منتظمین کو ’’ کراچی چلڈرن غزہ مارچ ‘‘ کے حوالے سے خطوط بھی ارسال کیے گئے ہیں ، غزہ چلڈرن مارچ کی تیاریوں و انتظامات کے لیے اور مارچ کو بھر پور اور کامیاب بنانے کے لیے متعدد کمیٹیاں تشکیل دی گئی ہیں ، جماعت اسلامی کراچی کے سیکریٹری توفیق الدین صدیقی کی زیر صدارت ادارہ نور حق میں پیر کے روز ’’کراچی چلڈرن غزہ مارچ ‘‘ کے حوالے سے ذمہ داران کا اہم اجلاس منعقد ہوا جس میں مارچ کی تیاریوں و انتظامات کا جائزہ لیا گیا ، متعدد فیصلے اور اقدامات طے کیے گئے اور ذمہ داران کے لیے ضروری ہدایات بھی جاری کی گئیں ۔

(جاری ہے)

مارچ میں اسکول کے بچے پوسٹر سازی ، تقاریر اور پریزینٹیشنز کے ذریعے بھی اپنی آواز قومی و بین الاقوامی میڈیا پر اُجاگر کریں گے ۔ دریں اثناء منعم ظفر خان نے اپنے ایک بیان میں کہا کہ 23ماہ سے غزہ لہو میں نہا رہا ہے ، 65ہزار سے زائد فلسطینی شہید ، 22ہزار سے زائد معصوم بچے شہید ، مساجد ، ہسپتال ، اسکول ، پناہ گزین کیمپ ‘ سب پر حملے ، عورتیں ، بوڑھے اور بچے ظلم کا نشانہ ، امریکہ اور اسرائیل کی درندگی نے غزہ کو قبرستان بنا دیا ہے ، غزہ بھوک سے تڑپ رہا ہے ، 10لاکھ سے زائد افراد خوراک سے محروم ، 5لاکھ سے زائد قحط کے شکنجے میں ، سینکڑوں بچے بھوک اور بیماری سے شہید ، غزہ کے معصوم بچوں کا خون ہمیں پکار رہا ہے ،ضروری ہے کہ اپنی آواز کو فلسطین کے مظلوم بچوں کی آواز بنا یا جائے ، غزہ کے لیے نکلا جائے کیونکہ معصوم بچوں کے لہو کا قرض ہم سب پر فرض ہے ۔