اسپیکر قومی اسمبلی سردار ایاز صادق کا نوابزادہ نصر اللہ کی بائیسویں برسی پر خراجِ عقیدت

منگل 16 ستمبر 2025 20:05

-اسلام آباد(اُردو پوائنٹ اخبارتازہ ترین - آن لائن۔ 16 ستمبر2025ء)اسپیکر قومی اسمبلی سردار ایاز صادق نے بابائے جمہوریت، مرحوم نوابزادہ نصر اللہ خان کی بائیسویں برسی کے موقع پر ان کی سیاسی جدوجہد اور گراں قدر خدمات کو خراجِ عقیدت پیش کیا ہے۔ انہوں نے کہا کہ نوابزادہ نصر اللہ خان ایک مدبر اور روادار سیاستدان تھے، انہوں نے جمہوریت کے استحکام اور جمہوری اقدار کے فروغ کیلئے گراں قدر خدمات سر انجام دیں اور ہمیشہ آئین کی حکمرانی، پارلیمان کی بالادستی اور عوامی حقوق کے تحفظ کے لیے سرگرم رہے۔

اسپیکر سردار ایاز صادق نے مزید کہا کہ نوابزادہ نصر اللہ خان کی سیاسی حکمت عملی، مصالحت پسندی اور اختلافات کو اتحاد میں بدلنے کی صلاحیت آج بھی قومی سیاست کے لیے ایک روشن مثال ہے۔

(جاری ہے)

ان کی جدوجہد نے قومی سطح پر اتفاق رائے کی سیاست کو فروغ دیا۔اسپیکر قومی اسمبلی نے کہا کہ نوابزادہ نصر اللہ خان تحریک پاکستان کے ایک سرگرم کارکن تھے اور بطور چیئرمین کشمیر کمیٹی انہوں نے مسئلہ کشمیر کو عالمی سطح پر بھرپور انداز میں اٴْجاگر کیا۔

اسپیکر قومی اسمبلی نے مزید کہا کہ نوابزادہ نصر اللہ خان کی سیاسی خدمات کے اعتراف میں انکی زیرِ استعمال ٹوپی اور حقہ قومی اسمبلی کے ہال آف آنر میں بطورِ یادگار رکھا گیا ہے۔انہوں نے کہا کہ نوابزادہ نصر اللہ خان کی دیانتداری، اصول پسندی اور جمہوری اقدار سے وابستگی نواجون نسل کیلئے مشعل راہ ہے۔ اسپیکر قومی اسمبلی نے کہا کہ نوابزادہ نصر اللہ خان کی جدو جہد اور خدمات تاریخ میں ہمیشہ یاد رکھی جائیں گی۔ انہوں نے اللّٰہ تعالیٰ سے مرحوم نوابزادہ نصر اللہ خان کی مغفرت اور درجات کی بلندی کے لیے دعا کی۔