اسلام آباد (اُردو پوائنٹ اخبارتازہ ترین - اے پی پی۔ 16 ستمبر2025ء) قومی پیغام امن کمیٹی میں اقلیتوں کی شمولیت انتہائی احسن اقدام ہے، ہمارے عقیدے اور مذاہب بعد میں پہلے ہم پاکستانی ہیں، امن کے لئے قرآن کریم میں جو اصول بتائے گئے ہیں ان پر عمل کرنے کی ضرورت ہے، رسول اکرمﷺ کا میثاق مدینہ مسلم و غیر مسلموں کے لئے انسانیت کا سب سے پہلا معاہدہ ہے، دہشت گردوں کے سہولت کاروں کے گرد شکنجہ سخت کرنے کی ضرورت ہے، اگر کوئی اس ملک کی طرف میلی آنکھ سے دیکھے گا تو ہم اس کے لئے اپنی جان بھی قربان کرنے کو تیار ہیں، پاک فوج کا کردار ہمارے لئے باعث فخر ہے۔
ان خیالات کا اظہار مقررین نے منگل کو یہاں پاک چائنہ فرینڈ شپ سینٹر میں قومی پیغام امن کمیٹی کے پہلے اجلاس کے دوران کیا۔
(جاری ہے)
کمیٹی کے اقلیتی رکن رجیش کمار نے کہا کہ سب سے پہلے میں وزیراعظم اور ان کی حکومت کا شکر گزار ہوں جنہوں نے ایک ایسی کمیٹی تشکیل دی جس میں ہندو، سکھ اور مسیحی برادری کی نمائندگی شامل ہے ۔ انہوں نے کہا کہ جب اس کمیٹی کا نوٹیفیکیشن ہوا تو اس وقت ہماری ہندو برادری نے کہا کہ یہ ہمارے لئے اعزاز کی بات ہے کہ ہمیں اس کمیٹی میں شامل کیا گیا ، 9 مئی کو جب ہندوستان نے حملہ کیا تو ہم نے اپنے مندروں میں اعلان کیا کہ ہم پاکستان اور پاک فوج کے ساتھ ہیں۔
انہوں نے کہا کہ مسلم اکثریت کے ساتھ ساتھ دیگر مذاہب کا کردار پاکستان بنانے سے لے کر اب تک شامل حال ہے، ہندو برادری کی طرف سے یقین دلاتا ہوں کہ ہندو برادری نے ہمیشہ مذہبی ہم آہنگی، بھائی چارے اور رواداری کے فروغ میں اپنا بھرپور کردار ادا کیا ہے اور پاکستان کے ساتھ ہیں۔ انہوں نے کہا کہ 20 اکتوبر کو دیوالی کا تہوار ہونا ہے، ہماری خواہش ہے کہ اس کمیٹی کے تحت اسلام آباد میں ایک دیوالی کی تقریب کا انعقاد کیا جائے جس میں تمام مذاہب کے لوگ شامل ہوں تا کہ دنیا کو پیغام دیا جا سکے کہ یہ عیدیں اور اس طرح کے دیگر تہوار ہم سب کے ہیں، ہمارے عقیدے اور مذاہب بعد میں ہیں پہلے ہم پاکستانی ہیں۔
شیخ الحدیث و قرآن مولانا محمد طیب پنج پیری نے کہا کہ ہمارے ملک میں دو چیزوں کی ضرورت ہے پہلی کہ امن ہو اور دوسرا قانون پر عملدرآمد ہو، قانون پر عملدرآمد بہت ضروری ہے، امن کے لئے قرآن کریم میں جو اصول بتائے گئے ہیں ان پر عمل کرنے کی ضرورت ہے۔ بشپ آزاد مارشل نے کہا کہ قومی پیغام امن کمیٹی ہمارے لئے نئی نہیں ہے، ہماری کوشش یہی ہے کہ امن قائم ہو۔
انہوں نے کہا کہ ماضی میں مساجد کے ساتھ ساتھ چرچز بھی دہشت گردی کا شکار رہے ہیں، دہشت گردوں کے سہولت کاروں کے گرد شکنجہ سخت کرنے کی ضرورت ہے۔ انہوں نے کہا کہ قائداعظم محمد علی جناح کا فرمان ہے کہ ہم سب برابر کے شہری ہیں۔ انہوں نے کہا کہ رواداری کی فضا کو بڑھائیں گے تو امن قائم ہو گا، ہم نے ہمیشہ پاکستان میں رواداری کو فروغ دیا ہے۔
انہوں نے کہا کہ قومی پیغام امن کمیٹی کے لئے ہر طرح کے تعاون کے لئے تیار ہیں۔ علامہ عارف واحدی نے کہا کہ ہم امن کے قیام کے لئے اپنا اپنا کردار ادا کر رہے ہیں، یہ ملک اللہ کی نعمت ہے اور ہم سب کا ہے، اللہ تعالیٰ نے 27 رمضان المبارک شب قدر کو پاکستان عطا کیا، اگر کوئی اس ملک کی طرف میلی آنکھ سے دیکھے گا تو ہم اس کے لئے اپنی جان بھی قربان کرنے کو تیار ہیں۔
انہوں نے کہا کہ جب ہم مسلم و غیر مسلم مل کر کام کریں گے تو کوئی بھی دشمن نقصان نہیں پہنچا سکتا، پاک فوج کا کردار ہمارے لئے باعث فخر ہے۔ علامہ محمد حسین اکبر نے کہا کہ رسول اکرمﷺ کا میثاق مدینہ مسلم و غیر مسلموں کے لئے انسانیت کا سب سے پہلا معاہدہ ہے جس میں مسلم و غیر مسلموں سب کو شامل کیا گیا۔ انہوں نے کہا کہ قومی پیغام امن کمیٹی پوری انسانیت پاکستان کے لئے بنائی گئی ہے، اس میں تمام مذاہب کے لوگوں کو شامل کرنا احسن اقدام ہے۔
سید ضیاء اللہ شاہ بخاری نے کہا کہ وزیراعظم اور وزیر اطلاعات سمیت تمام کا شکر گزار ہوں کہ مجھے اس کمیٹی میں شامل کیا گیا، معرکہ حق میں کامیابی کے بعد پاکستان دنیا میں مضبوط طور پر ابھر کر سامنے آیا ہے، اس کے بعد دشمن حسد کا شکار ہو چکا ہے، دشمن ہمیں منتشر اور ہماری نوجوان نسل کو گمراہ کرنے کی ناپاک کوشش کر رہا ہے، اس کے تناظر میں اس کمیٹی کا قیام خوش آئند ہے، انشاء اللہ ہم آپ کے اعتماد پر پورا اتریں گے، ہم ریاست پاکستان کو کسی طور پر کمزور نہیں ہونے دیں گے، علماء ملک میں یکجہتی کی فضاء قائم کرنے کے لئے اپنا کردار ادا کریں گے۔
پیر نقیب الرحمان نے کہا کہ قومی پیغام امن کمیٹی کا قیام خوش آئند ہے، ملک میں امن و ہم آہنگی کی فضاء قائم کرنے کے لئے اپنا کردار ادا کرتے رہیں گے۔ مفتی عبدالرحیم نے کہا کہ قومی پیغام امن کمیٹی میں اقلیتوں کی شمولیت انتہائی احسن اقدام ہے۔ وفاقی وزیر اطلاعات و نشریات عطاء اللہ تارڑ ،پاکستان علماء کونسل کے چیئرمین حافظ طاہر محمود اشرفی اور ڈائریکٹر جنرل انٹرل پبلسٹی عاشق شیخ نے بھی اظہار خیال کیا۔\932
