پہلا ویمنز ون ڈے انٹرنیشنل، جنوبی افریقہ نے پاکستان کو8وکٹوں سے ہرادیا

لاہور (اُردو پوائنٹ اخبارتازہ ترین - اے پی پی۔ 17 ستمبر2025ء) جنوبی افریقہ ویمنز نے پاکستان ویمنز کو پہلے ون ڈے انٹرنیشنل میں 8وکٹوں سے شکست دے کر تین میچوں کی سیریز میں ایک صفر کی برتری حاصل کرلی۔اس میچ کی خاص بات جنوبی افریقہ کی ماریزان کیپ ا ور تیزمین برٹس جبکہ پاکستان کی سدرہ امین کی سنچریاں تھیں۔قذافی سٹیڈیم لاہور میں منگل کو کھیلے گئے پہلے ون ڈے انٹرنیشنل کا ٹاس پاکستان نے جیتا اور پہلے بیٹنگ کرتے ہوئے مقررہ 50اوورز میں 4وکٹوں کے نقصان پر255رنز بنائے۔

جنوبی افریقہ نے 48اعشاریہ دو اوورز میں دو وکٹوں کے نقصان پر ہدف حاصل کرلیا۔پاکستان کو اننگز کے دوسرے ہی اوور میں نقصان اٹھانا پڑا جب شوال ذوالفقار بغیر کوئی رن بنائے آوٹ ہوگئیں جس کے بعد منیبہ علی اور سدرہ امین نے دوسری وکٹ کی شراکت میں 147رنز کا اضافہ کیا جو ون ڈے انٹرنیشنل میں پاکستان ویمنز کی دوسری وکٹ کی ریکارڈ شراکت ہے۔

(جاری ہے)

اس سے قبل یہ ریکارڈ 143رنز کا تھا جس میں سدرہ امین اور بسمہ معروف شریک تھیں۔

منیبہ علی نے اپنے 50ویں ون ڈے انٹرنیشنل میں پانچویں نصف سنچری سکور کرتے ہوئے 11چوکوں کی مدد سے76رنز بنائے۔ سدرہ امین نے 150گیندوں پر 12چوکوں کی مدد سے121رنز سکور کیے اور وہ ناٹ آوٹ رہیں ۔ یہ ان کی ون ڈے انٹرنیشنل میں 5 ویں سنچری ہے۔ انہوں نے ون ڈے انٹرنیشنل میں اپنے دو ہزار رنز بھی مکمل کرلیے۔ وہ بسمہ معروف اور جویریہ خان کے بعد یہ اعزاز حاصل کرنے والی پاکستان کی تیسری بیٹر ہیں۔

عالیہ ریاض نے 5چوکوں کی مدد سے 33رنز کی اننگز کھیلی اور سدرہ امین کے ساتھ تیسری وکٹ کی شراکت میں 68رنز کا اضافہ کیا۔کپتان فاطمہ ثنا 3رنز بناکر آوٹ ہوئیں۔ نتالیہ پرویز5رنز پر ناٹ آوٹ رہیں۔جنوبی افریقہ کی طرف سے آیابونگا کھاکا نے دو وکٹیں حاصل کیں۔جنوبی افریقہ کی اننگز میں کپتان وولوارٹ 4رنز بناکر سعدیہ اقبال کی گیند پر بولڈ ہوگئیں۔

سونے لوز کو 30رنز پر رامین شمیم نے آوٹ کردیا جس کے بعد تیزمین برٹس اور ماریزان کیپ نے216رنز کی شراکت قائم کرکے اپنی ٹیم کی جیت کو ممکن بنادیا۔یہ جنوبی افریقہ کی تیسری وکٹ کی ریکارڈ شراکت بھی ہے۔برٹس 9 چوکوں کی مدد سے 101رنز بناکر ناٹ آوٹ رہیں۔ یہ ان کی پانچویں سنچری ہے۔کیپ نے 13چوکوں اور 2چھکوں کی مدد سے کریئر بیسٹ 121رنز سکور کیے اور نان آوٹ رہیں۔یہ ان کی چوتھی سنچری ہے،سیریز کے اگلے دو ون ڈے انٹرنیشنل لاہور میں 19اور 22ستمبر کو کھیلے جائیں گے۔