آئندہ سالوں میں پاکستان کے موسمیاتی تبدیلیوں سے زیادہ متاثر ہونے کا خطرہ

ملک میں گلیشیئرز تیزی سے ختم ہو رہے ہیں، عالمی درجہ حرارت میں اضافہ موسمیاتی تبدیلی کا باعث ہے؛ چیئرمین این ڈی ایم اے

ساجد علی بدھ 17 ستمبر 2025 13:19

آئندہ سالوں میں پاکستان کے موسمیاتی تبدیلیوں سے زیادہ متاثر ہونے ..

اسلام آباد ( اُردو پوائنٹ اخبارتازہ ترین۔ 17 ستمبر 2025ء ) پاکستان کے آئندہ سالوں میں موسمیاتی تبدیلیوں سے زیادہ متاثر ہونے کا خطرے سے خبردار کردیا گیا۔ تفصیلات کے مطابق چیئرمین نیشنل ڈیزاسٹر مینجمنٹ اتھارٹی (این ڈی ایم اے) لیفٹیننٹ جنرل انعام حیدر ملک کا کہنا ہے کہ ’پاکستان آنے والے سالوں میں موسمیاتی تبدیلیوں سے زیادہ متاثر ہوگا، آنے والے سالوں میں بارشوں کی زیادہ توقعات ہیں، پاکستان میں 7 ہزار سے زائد گلیشیئر موجود ہیں، ملک کے یہ گلیشیئرز تیزی سے ختم ہو رہے ہیں‘ انہوں نے یہ بات پاکستان پیپلز پارٹی کی سینیٹر شیری رحمان کی زیرِ صدارت سینیٹ کمیٹی برائے موسمیاتی تبدیلی کے اجلاس میں مون سون سے متعلق بریفنگ دیتے ہوئے کہی۔

چیئرمین این ڈی ایم اے نے کمیٹی کو بتایا کہ رواں سال مون سون 2 ہفتے پہلے شروع ہوا، پاکستان آنے والے ہر سال میں موسمیاتی تبدیلیوں سے بری طرح متاثر ہوگا، عالمی درجہ حرارت میں اضافہ موسمیاتی تبدیلی کا باعث ہے، پاکستان کے 7 ہزار سے زائد گلیشیئر تیزی سے ختم ہو رہے ہیں، بھارت نے پاکستان کے ساتھ ڈیمز کا کوئی ڈیٹا شئیر نہیں کیا، آنے والے سالوں میں بارشوں کی زیادہ توقعات ہیں۔

(جاری ہے)

لیفٹیننٹ جنرل انعام حیدر ملک نے کہا کہ ڈیزاسٹر کے لیے پیسہ دینے والے ممالک خود موسمیاتی تبدیلی کے مسائل کا شکار ہیں، ہماری اپنی استعداد، اقوام متحدہ کی فراہم کردہ معلومات سے زیادہ بہتر ہے، این ڈی ایم اے کی پیش گوئی 98 فیصد بہتر ہے، آج گڈو بیراج پر 5 لاکھ کا ریلا جمع ہوگا، آزاد جموں و کشمیر اور پنجاب کے دریاؤں میں اس بار زیادہ پانی ہے، قادر آباد سدھنائی اور جھنگ میں بند توڑ کر پانی کے ریلوں کا زور کم کیا گیا۔