Live Updates

سیلاب متاثرین تک امداد میں تاخیر سمجھ سے باہر ہے ،شیری رحمن

حکومت کو بے نظیر انکم سپورٹ پروگرام کے تحت سیلاب سے متاثرہ لوگوں کو فوری امداد جاری کر نی چاہیے، میڈیا سے گفتگو

بدھ 17 ستمبر 2025 20:05

اسلام آباد (اُردو پوائنٹ اخبارتازہ ترین - این این آئی۔ 17 ستمبر2025ء) چیئر مین اسٹینڈنگ کمیٹی سینیٹ برائے ماحولیاتی تبدیلی سینیٹر سینیٹر شیری رحمان نے کہاہے کہ سیلاب متاثرین تک امداد میں تاخیر سمجھ سے باہر ہے ، حکومت کو بے نظیر انکم سپورٹ پروگرام کے تحت سیلاب سے متاثرہ لوگوں کو فوری امداد جاری کر نی چاہیے ۔ میڈیا سے گفتگو کرتے ہوئے شیری رحمن نے کہاکہ سب سے پہلے یہ طے ہونا چاہیے پاکستان میں اس سنگین سیلاب کا کیا سٹیٹس ہے ،پتا چلنا چاہیے سیلاب سے متاثرہ افراد میں کتنے لوگوں تک امداد پہنچ رہی ہے۔

انہوںنے کہاکہ متاثرین تک امداد میں تاخیر سمجھ سے باہر ہے ، حکومت کو بے نظیر انکم سپورٹ پروگرام کے تحت سیلاب سے متاثرہ لوگوں کو فوری امداد جاری کر نی چاہیے ،کم سے کم متاثرین تک اتنی کیش پہنچی چاہیے کہ وہ اپنا اور اپنے مال مویشی کے کھانے کا بندو بست کر سکیں۔

(جاری ہے)

شیری رحمان نے کہاکہ سیلاب میں سب سے زیادہ متاثر بچے اور خواتین ہوتے ہیں ،2022میں سیلاب متاثرین کو بی آئی ایس پی کے تحت فوری رقوم جاری کی گئیں،ماحولیاتی تبدیلی کو کنٹرول کرنا ہمارے بس میں ہے موجوڈہ سیلاب میں ہمیں متاثرین کیلئے انٹرنیشنل کمیونٹی سے فوری امداد کی درخواست کرنی چاہیے ۔

شیری رحمان نے کہاکہ چیئرمین بلاول کے مطالبے پر ہی ملک میں زرعی اور کلائمٹ ایمرجنسی کا نفاذ کیا گیا ، گلگت بلتستان میں صورتحال بہت سنگین ہے وہاں کے لوگ کبھی گلیشیر پگھلنے سے اور کبھی گلاف سے متاثر ہو رہے ہیں ،گلگت بلتستان میں سائٹس ڈبل ہو چکی ہین جہاں ابتدائی وارننگ سسٹم کی اشد ضرورت ہے،ان سب معاملات پر جو اخراجات ہو رہے ہیں ان کا بھی آڈٹ ہونا چاہیے ۔ انہوںنے کہاکہ حالیہ سیلاب کے تناظر میں میپنگ کا ہونا بہت ضروری ہے تاکہ ہر صوبے پر دیہات کو پتا ہو کہ انہوں نے کہاں کنسٹرکشن کرنی ہے ۔ انہوںنے کہاکہ لوکاسٹ سٹوریج کے طریقہ کار بھی تلاش کرنے ہوں گے ،واٹر ویز میپنگ اور جنگلات کو کٹائی سے روکنا بہت اہم ہے ۔