اوورسیز پاکستانیوں کیلئے انقلابی اقدام، پنجاب میں جدید فیسلیٹیشن سینٹر قائم کر دیا گیا

جمعرات 18 ستمبر 2025 21:10

لاہور (اُردو پوائنٹ اخبارتازہ ترین - اے پی پی۔ 18 ستمبر2025ء) اوورسیز پاکستانیز کمیشن پنجاب نے بیرونِ ممالک میں مقیم پاکستانیوں کے مسائل کے فوری حل اور شکایات کے ازالے کے لیے ایک جدید فیسلیٹیشن سینٹر قائم کر دیا ہے۔ یہ اقدام اوورسیز پاکستانیوں کو زیادہ سے زیادہ سہولت اور براہِ راست معاونت فراہم کرنے کی جانب ایک انقلابی قدم ہے۔اس فیسلیٹیشن سینٹر میں پولیس، ریونیو اور اوورسیز کمیشن پنجاب کے نمائندے ہمہ وقت موجود ہیں تاکہ شکایات کے اندراج، ان پر بروقت کارروائی اور مسائل کے حل کو یقینی بنایا جا سکے۔

اوورسیز پاکستانی اب اپنی شکایات درج کروانے، فرد حاصل کرنے اور مختلف سرکاری محکموں سے متعلقہ معاملات کے حل کے لیے ایک ہی چھت تلے سہولیات حاصل کر سکتے ہیں۔

(جاری ہے)

مزید برآں اوورسیز پاکستانیوں کے لیے یہ سہولت بھی فراہم کی گئی ہے کہ فیسلیٹیشن سینٹر کے ساتھ ہی قائم بزنس فیسلیٹیشن سینٹر سے وہ سرمایہ کاری کے مواقع سے فائدہ اٹھا سکیں۔ اس سینٹر میں سرمایہ کاروں کو ایک ہی چھت تلے تمام متعلقہ سہولیات میسر ہیں تاکہ بیرونِ ملک مقیم پاکستانی نہ صرف اپنے مسائل حل کروا سکیں بلکہ پاکستان میں محفوظ اور آسان سرمایہ کاری بھی کر سکیں۔

ترجمان او سی پی پنجاب کے ترجمان کے مطابق یہ فیسلیٹیشن سینٹر جدید ٹیکنالوجی اور مو ثر مانیٹرنگ سسٹم سے لیس ہے تاکہ اوورسیز پاکستانیوں کی درخواستوں پر شفاف اور فوری عملدرآمد یقینی بنایا جا سکے۔ مزید برآں یہاں آن لائن سہولیات بھی فراہم کی گئی ہیں تاکہ دنیا کے کسی بھی کونے میں مقیم پاکستانی باآسانی اپنے مسائل درج کروا سکیں۔اوورسیز پاکستانیز کمیشن پنجاب کا یہ عزم ہے کہ بیرونِ ملک مقیم پاکستانیوں کے مسائل کو اولین ترجیح پر حل کیا جائے اور انہیں سرمایہ کاری کے بہتر مواقع فراہم کر کے ملکی معیشت کو مزید مضبوط بنایا جائے۔