Live Updates

بارشوں اور سیلاب سے متاثرہ علاقوں میں 51 گرڈ ، 588 فیڈرز متاثر ہوئے، 356 فیڈر مکمل ، 225 کو جزوی طور پر بحال کر دیا گیا، پاور ڈویژن رپورٹ

اتوار 21 ستمبر 2025 12:00

اسلام آباد (اُردو پوائنٹ اخبارتازہ ترین - اے پی پی۔ 21 ستمبر2025ء) بارشوں اور سیلاب سے متاثرہ علاقوں میں مجموعی طور پر 51 گرڈ اور 588 فیڈرز متاثر ہوئے، 356 فیڈر مکمل اور 225 جزوی طور پر بحال کر دیا گیا۔اتوار کو پاور ڈویژن کی جانب سے بجلی بحالی پر جاری 21 ستمبر تک کی رپورٹ کے مطابق فیسکو کے زیرِ انتظام علاقوں میں 28 گرڈ اور 81 فیڈرز متاثر ہوئے۔ متاثرہ فیڈرز میں 57 مکمل اور 24 جزوی طور پر بحال کردئیے گئے۔

فیسکو کے 12432 متاثرہ صارفین کیلئے بجلی کی بحالی کا کام 21 سے 22 ستمبر تک مکمل کرنے کی توقع ہے۔ پاورڈویژن کے مطابق لیسکو کے 67 متاثرہ فیڈرز میں سے 66 مکمل اور 1 جزوی طور پر بحال ہوچکے ہیں، لیسکو کے 441 متاثرہ صارفین کیلئے بجلی کی بحالی کا کام 22 ستمبر تک مکمل کرنے کی توقع ہے،لیسکو کے زیرِ انتظام علاقے لاہور، ننکانہ، شیخوپورہ اور اوکاڑہ میں بجلی کی بحالی کا کام مکمل کر لیا گیا۔

(جاری ہے)

پاور ڈویژن کے مطابق میپکو کے 181 متاثرہ فیڈرز میں سے 23 مکمل اور 151 جزوی طور پر بحال ہوئی، میپکو کے زیرِ انتظام علاقوں میں پانی اترتے ہی متاثرہ فیڈرز کی مکمل بحالی کا کام شروع ہو جائے گا۔گیپکوکے کے 11 گرڈز اور 103فیڈرزمتاثر ہوئے ،متاثرہ فیڈرز میں سے 101 فیڈرز مکمل اور 2 جزوی طور پر بحال ہوچکے ہیں،گیپکو کے 204 متاثرہ صارفین کیلئے بجلی بحالی کا کام سیلاب کا پانی اترنے پر مکمل کر لیا جائے گا۔

رپورٹ پاور ڈویژن کے مطابق پیسکو کے 88 فیڈرز مکمل اور 3 جزوی طور پر بحال کردئیے گئے ہیں،پیسکو کے زیرِ انتظام علاقے سوات، صوابی اور ڈی آئی خان میں بجلی کی بحالی کا کام مکمل ہو چکا ہے۔ٹیسکو کے علاقے شمالی وزیرستان اور خیبر کے 18 متاثرہ فیڈرز مکمل طور پر بحال ہوئے ۔ ہیزیکو کے زیرِ انتظام علاقے مانسہرہ کے 3 متاثرہ فیڈر مکمل طور پر بحال،سیپکو کے زیرِ انتظام علاقے کے 44 متاثرہ فیڈر عارضی طور پر بحال ہوئے ہیں۔