گجرات میں بے زبان جانور پر تشدد کا بہیمانہ واقعہ، نامعلوم افراد نے بھینس کی 2 ٹانگیں کاٹ ڈالیں

گجرات ( اُردو پوائنٹ اخبارتازہ ترین۔ 23 ستمبر2025ء ) صوبہ پنجاب کے ضلع گجرات میں نامعلوم افراد بھینس کی 2 ٹانگیں کاٹ کر فرار ہوگئے۔ میڈیا رپورٹس کے مطابق سکھر کے بعد اب گجرات میں بے زبان جانوروں کے ساتھ تشدد کا ایک اور بہیمانہ واقعہ سامنے آیا ہے جہاں گجرات کے نواحی علاقہ جلال پور جٹاں میں نامعلوم افراد نے بھینس کی 2 ٹانگیں کاٹ دیں، جس کا مقدمہ درج کرلیا گیا جب کہ بھینس کے مالک نے ملزمان کی فوری گرفتاری کا مطالبہ کیا ہے، اس حوالے سے بھینس کے مالک نے بتایا ہے کہ بھینس خاندان کی کفالت کا واحد ذریعہ اور کل اثاثہ تھی جس کی ٹانگیں کاٹ دی گئیں، اس واقعے میں ملزموں کو جلد از جلد گرفتار کیا جائے۔

دو روز قبل صوبہ سندھ کے ضلع سکھر کے علاقہ روہڑی میں اونٹ کی ٹانگ کاٹنے والے دو ملزمان کو پولیس نے گرفتار کرلیا ، متاثرہ اونٹ کو وزیراعلی کی ہدایت پر کراچی منتقل کردیا گیا، وزیر اعلی سندھ سید مراد علی شاہ نے سکھر کے علاقے روہڑی میں تین حملہ آوروں کی جانب سے پانی پینے پر اونٹ کی ٹانگ کاٹنے کی واقعے کی شدید الفاظ میں مذمت کی، انہوں نے درندہ صفت ملزمان کے خلاف فوری قانونی کارروائی کرنے کا حکم دیا، وزیر اعلی سندھ نے جانور پر ہونے والے ظلم کو "ناقابل برداشت" قرار دیتے ہوئے سکھر پولیس کو ہدایت کی کہ مجرمان کو فوری طور پر گرفتار کر کے مثالی سزا دی جائے۔

(جاری ہے)

بتایا جارہا ہے کہ وزیراعلی سندھ کی ہدایت پر سکھر پولیس نے بھرپور کارروائی کرتے ہوئے تین ملزمان میں سے دو کو کامیابی سے گرفتار کر لیا، ملزم قربان بروہی کو سب سے پہلے بھی گرفتار کیا گیا، جب کہ پولیس نے دوسرے ملزم رسول بخش شیخ کو ایس ایچ او کندھارا کی جانب سے خفیہ اطلاع پر چھاپہ مار کر حراست میں لے لیا، پولیس تیسرے نامزد ملزم کا سراغ لگانے اور گرفتاری کے لیے مختلف علاقوں میں چھاپے مارے جارہے ہیں۔

دریں اثنا زخمی اونٹ روہڑی میں ویٹرنری میں زیر علاج رہی جس کی نگرانی ضلع کونسل کے چیئرمین سید کمیل شاہ کر رہے ہیں جو پہلے ہی وزیر اعلی سندھ کو تفصیلی رپورٹ پیش کر چکے ہیں، سندھ حکومت نے یقین دہانی کرائی ہے کہ جانور کو بہترین طبی امداد فراہم کی جائے گی، وزیراعلی سندھ سید مراد علی شاہ کی ہدایت پر تشدد زدہ اونٹنی سکھر سے کراچی کے شیلٹر منتقل کردیا گیا ہے جہاں اونٹنی کا نام سمی رکھا گیا ہے، سمی کی ٹانگ کچلی ہوئی ، جبڑا ٹوٹا ہوا، زبان جلی اور جسم پر شدید زخم ہیں، وہ کچھ کھانے کے قابل نہیں،جس کی وجہ سے آئی وی فلوز لگائی جا رہی ہیں۔