Live Updates

آسٹریلیا کی مڈل آرڈر بیٹرگریس ہیریس انجری کے باعث ورلڈ کپ سے باہر، ہیتر گراہم کو ٹیم میں شامل کر لیا گیا

منگل 23 ستمبر 2025 12:52

کینبرا (اُردو پوائنٹ اخبارتازہ ترین - اے پی پی۔ 23 ستمبر2025ء) آسٹریلیا کی مڈل آرڈر بیٹر گریس ہیریس پنڈلی میں تکلیف کے باعث آئی سی سی ویمنز ون ڈے ورلڈ کپ سے باہر ہو گئی ہیں۔کرکٹ ویب سائٹ کے مطابق بیٹر گریس ہیریس کی جگہ ہیتر گراہم کوآسٹریلوی ویمنز ورلڈ کپ سکواڈ میں شامل کر لیا گیا ہے۔گریس ہیریس کو یہ چوٹ گزشتہ ہفتہ کو دہلی میں بھارت کے خلاف آخری ون ڈے میچ کے دوران فیلڈنگ کرتے ہوئے لگی۔

(جاری ہے)

یہ سیریز کا واحد میچ تھا جس میں وہ کھیلیں کیونکہ انہیں اینیبل سدرلینڈ کے متبادل کے طور پر شامل کیا گیا تھا، جو کولہے کی تکلیف کی وجہ سے بھارت کے خلا ف سیریز سے باہر ہو گئی تھیں۔ گریس ہیریس کی نیچے کے نمبر پر تیز بیٹنگ کی صلاحیت ٹیم کے لیے اہم سمجھی جا رہی تھی، خاص طور پر ایسے وقت میں جب آسٹریلیا کی ٹیم کو کئی انجری مسائل کا سامنا ہے۔28 سالہ ہیتر گراہم نے 2019 میں آسٹریلیا کی جانب سے اپنا واحد ون ڈے کھیلا تھا اور وہ گزشتہ سال ستمبر میں اپنا آخری ٹی ٹونٹی انٹرنیشنل کھیل چکی ہیں۔ واضح رہے کہ آئی سی سی ویمنز ون ڈے ورلڈ کپ 30 ستمبر سے بھارت اور سری لنکا میں کھیلا جائے گا۔