آزاد کشمیر ہائیکورٹ کا چیف الیکشن کمشنر کی فوری تعیناتی کا حکم

وزیراعظم کو چیف الیکشن کمشنر تعیناتی کیلئے ناموں کاپینل بھجوانے کی ہدایت

منگل 23 ستمبر 2025 17:54

مظفر آباد (اُردو پوائنٹ اخبارتازہ ترین - این این آئی۔ 23 ستمبر2025ء)آزاد کشمیر ہائیکورٹ نے چیف الیکشن کمشنر کی فوری تعیناتی کا حکم اور وزیراعظم کو چیف الیکشن کمشنر کی تعیناتی کیلئے چئیرمین کشمیر کونسل کو ناموں کا پینل بھجوانے کی ہدایت کی ہے ۔آزاد کشمیر ہائی کورٹ نے چوہدری اعجاز حسین کھٹانہ کی رٹ پر وزیر اعظم آزاد کشمیر کو آئینی ذمہ داری پورا کرنے کا حکم دیا ہے، جسٹس سردار اعجاز خان نے کیس کی سماعت کی۔

(جاری ہے)

خیال رہے کہ آزاد کشمیر کے عام انتخابات میں 10 ماہ سے بھی کم عرصہ رہ گیا، تاحال آزاد جموں کشمیر الیکشن کمیشن کے ممبرز اور چیف الیکشن کمشنر کی تقرری نہیں کی جاسکی۔آئین کی تحت وزیراعظم قائد حزب اختلاف سے مشاورت کے بعد نام چیئرمین کشمیر کونسل کو بھجواتے ہیں۔ وزیراعظم پاکستان چیئر مین کشمیر کونسل کی حیثیت سے آزاد جموں کشمیر کے چیف الیکشن کمشنر اور اعلیٰ عدلیہ میں ججوں کی تعیناتی کرتے ہیں۔