33 سال کا انتظارختم، شاہ رخ خان نے بالآخر پہلا نیشنل فلم ایوارڈ حاصل کرلیا

ْ شاہ رخ خان نے فلم جوان میں ڈبل رول کیا تھا اور وہ فلم میں 7 مختلف روپ بدلتے نظر آئے تھے

بدھ 24 ستمبر 2025 17:41

33 سال کا انتظارختم، شاہ رخ خان نے بالآخر پہلا نیشنل فلم ایوارڈ حاصل ..

ممبئی (اُردو پوائنٹ اخبارتازہ ترین - این این آئی۔ 24 ستمبر2025ء)بالی وڈ کے کنگ شاہ رخ خان کا انتظار ختم ہوا اور بالآخر انہوں نے اپنے 33 سالہ فلمی کیریئر میں پہلا نیشنل فلم ایوارڈ حاصل کرلیا۔بھارتی میڈیا کے مطابق 71ویں نیشنل فلم ایوارڈز کی تقریب نئی دہلی میں منعقد ہوئی جہاں بھارتی صدر دروپدی مرمو نے فاتحین کو ایوارڈ پیش کیے۔ شاہ رخ خان نے سن 2023 میں ریلیز ہونے والی فلم ’’جوان‘‘کیلئے بہترین اداکار کا نیشنل فلم ایوارڈ حاصل کیا۔

یہ ان کے 33 سالہ فلمی کیریئر میں پہلا نیشنل فلم ایوارڈ ہے۔اس کے علاوہ 2023 میں ہی ریلیز ہونے والی فلم ’’12th فیل‘‘میں جاندار اداکاری کرنے والے وکرانت میسی کو بھی شاہ رخ کے ساتھ مشترکہ طور پر بہترین اداکار کا نیشنل ایوارڈ دیا گیا۔

(جاری ہے)

اداکارہ رانی مکھرجی کو فلم 'Mrs Chatterjee vs Norway' میں شاندار اداکاری پر بہترین اداکارہ کا نیشنل ایوارڈ ملا۔واضح رہے کہ شاہ رخ خان، جنہیں دنیا بھر میں ’’کنگ آف بالی وڈ‘‘کے طور پر جانا جاتا ہے نے 1992 میں فلم’’دیوانا‘‘سے اپنے فلمی سفر کا آغاز کیا تھا۔

انہوں نے اپنے فلمی کیریئر میں ’’دل والے دلہنیا لے جائیں گے‘‘،’’چک دی! انڈیا‘‘،’’کچھ کچھ ہوتا ہے‘‘جیسی کئی مشہور فلموں میں اپنی شاندار اداکاری سے مداحوں کے دلوں پر راج کیا۔شاہ رخ خان نے 33 سالہ فلمی کیریئر میں کئی بڑے ایوارڈز بھی جیتے بلکہ انہیں دوسرے ملکوں کی جانب سے بھی کئی بین الاقوامی اعزازات سے نوازا گیا لیکن وہ ایک بار بھی بھارت کے نیشنل ایوارڈ کو جیتنے میں کامیاب نہیں ہوئے تھے۔

تاہم اب شاہ رخ خان کا یہ خواب بالآخر پورا ہوگیا ہے اور انہوں نے فلم جوان کیلئے نیشنل ایوارڈ جیتا۔ شاہ رخ خان نے فلم جوان میں ڈبل رول کیا تھا اور وہ فلم میں 7 مختلف روپ بدلتے نظر آئے تھے۔ واضح رہے کہ بھارت کے 71ویں نیشنل فلم ایوارڈز کے فاتحین کا اعلان یکم اگست کو کیا گیا تھا۔