آزاد کشمیر میں جاری احتجاجی صورتحال، وفاقی حکومت کا مذاکرات میں معاونت فراہم کرنے کا فیصلہ

بدھ 24 ستمبر 2025 17:01

اسلام آباد (اُردو پوائنٹ اخبارتازہ ترین - این این آئی۔ 24 ستمبر2025ء)آزاد کشمیر میںاحتجاجی صورتحال کے پیش نظر وفاقی حکومت نے مذاکرات میں معاونت فراہم کرنے کا فیصلہ کرلیا۔میڈیارپورٹ کے مطابق وزیراعظم شہباز شریف نے وفاق کی جانب سے مذاکراتی عمل میں ثالثی کیلئے دو نمائندے مقرر کردیئے، وفاقی وزیر پارلیمانی امورطارق فضل چوہدری اور وفاقی وزیر امور کشمیر و گلگت بلتستان امیر مقام وفاق کے نمائندہ وفد میں شامل ہیں۔

(جاری ہے)

دونوں وفاقی وزراء وفاق کی نمائندگی کرتے ہوئے آزاد کشمیر میں مسائل کے حل کیلئے کوششوں کو کامیاب بنانے میں کردار ادا کریں گے۔ ذرائع کے مطابق وفاق کا نمائندہ وفد حکومت آزاد جموں و کشمیر اور جوائنٹ عوامی ایکشن کمیٹی کے نمائندوں سے ملاقات کرے گا، وزیراعظم آفس نے مذاکراتی عمل میں معاونت کیلئے چیف سیکرٹری آزاد کشمیر اور وفاقی وزراء کو ہدایت نامہ جاری کردیا جس میں کہاگیاکہ حکومت پاکستان تمام عمل میں فریقین کو قریب لانے اورمسائل خوش اسلوبی سے حل کرنے میں مدد فراہم کرنا چاہتی ہے، وزیر اعظم آفس کی جانب سے حکومت آزاد جموں و کشمیر کو اس سلسلے میں مکمل تعاون فراہم کرنے کی ہدایت کی گئی ۔