Live Updates

شاہین آفریدی نے ٹی ٹونٹی انٹرنیشنلز میں اہم کارنامہ سر انجام دیدیا

شاہین نے 17 رنز دیکر 3 وکٹیں حاصل کیں، 13 گیندوں پر 19 رنز بنائے اور پلیئر آف دی میچ قرار پائے

ذیشان مہتاب جمعہ 26 ستمبر 2025 10:33

شاہین آفریدی نے ٹی ٹونٹی انٹرنیشنلز میں اہم کارنامہ سر انجام دیدیا

لاہور (اردو پوائنٹ تازہ ترین اخبار ۔ 26 ستمبر 2025ء ) پاکستان کرکٹ ٹیم کے فاسٹ بولر شاہین شاہ آفریدی نے ٹی ٹوئنٹی انٹرنیشنل میں اہم کارنامہ سرانجام دے دیا۔

ایشیا کپ ٹی ٹونٹی کے سپر 4 مرحلے کے اہم میچ میں پاکستان نے بنگلادیش کو دلچسپ مقابلے کے بعد 11 رنز سے شکست دے کر فائنل کیلئے کوالیفائی کرلیا۔ پاکستان کے 136 رنز کے ہدف کے تعاقب میں بنگلادیش کی ٹیم مقررہ 20 اوورز میں 9 وکٹوں پر 124 رنز بناسکی۔

پاکستان کی جانب سے شاہین آفریدی شاہ آفریدی نے 17 رنز دے کر 3 وکٹیں حاصل کیں اور پلیئر آف دی میچ قرار پائے۔ انہوں نے میچ میں 13 گیندوں پر 19 رنز بھی بنائے تھے جس میں 2 چھکے شامل تھے۔

یہ شاہین آفریدی کا ٹی ٹونٹی انٹرنیشنل میں 10واں مین آف دی میچ کا ایوارڈ ہے، جس کے بعد وہ اس فارمیٹ میں سب سے زیادہ پلیئر آف دی میچ کا ایوارڈ حاصل کرنے والے فاسٹ بولر بن گئے ہیں۔

(جاری ہے)

اس سے قبل ایشیا کپ کے سپر فور مرحلے میں پاکستان نے بنگلادیش کو 11 رنز سے شکست دے کر فائنل میں جگہ بنالی۔

دبئی کرکٹ اسٹیڈیم میں کھیلے گئے میچ میں بنگلادیش کی ٹیم 136 رنز کاتعاقب کرتے ہوئے مقررہ اوورز میں 9 وکٹوں کے نقصان پر 124 رنز بنا سکی۔ بنگلادیش کی جانب سے شمیم حسین 30 رنز بنا کر نمایاں رہے۔ سیف حسن 18، نورالحسن 16، مہدی حسن 11، تنظیم حسن ثاقب 10، کپتان جاکر علی 5، توحید ہرودئے 5، تسکین احمد 4 اور پرویز حسین ایمان 0 پر آؤٹ ہوئے۔

رشاد حسین اور مستفیض الرحمان بالترتیب 16 اور 6 رنز بنا کر ناٹ آؤٹ رہے۔ پاکستان کی جانب سے شاہین شاہ آفریدی اور حارث رؤف نے 3، 3 جبکہ صائم ایوب نے 2 اور محمد نواز نے 1 وکٹ حاصل کی۔ اس سے قبل بنگلادیش کی دعوت پر قومی ٹیم نے پہلے بیٹنگ کرتے ہوئے مقررہ 20 اوورز میں 8 وکٹوں کی نقصان پر 135 رنز اسکور کیے۔ پاکستان کی جانب سے محمد حارث 31 رنز بنا کر نمایاں رہے۔

محمد نواز 25، شاہین شاہ آفریدی 19، کپتان سلمان آغا 19، فخر زمان 13، صاحبزادہ فرحان 4 اور حسین طلعت 3 رنز کے انفرادی اسکور پر آؤٹ ہوئے۔ فہیم اشرف 14 اور حارث رؤف 3 رنز کے ساتھ ناٹ آؤٹ پویلین لوٹے۔ صائم ایوب نے 45 بین الاقوامی ٹی ٹوئنٹی میچز کے کیریئر میں 9ویں بار صفر پر آؤٹ ہوتے ہوئے شاہد آفریدی کو پیچھے چھوڑ کر صفر پر آؤٹ ہونے والے دوسرے پاکستانی کھلاڑی بن گئے۔ بنگلادیش کی جانب سے تسکین احمد نے 3، رشاد حسین اور مہدی حسن نے 2، 2 اور مستفیض الرحمان نے 1 وکٹ حاصل کی۔

28 ستمبر بروز اتوار کھیلے جانے والے فائنل میں بھارت کا مقابلہ پاکستان کے ساتھ ہوگا۔