ڈی جی آئی ایس پی آر کا پنجاب یونیورسٹی کا دورہ، طلباء کے سوالات کے جواب دئیے

فوج کیخلاف پھیلائی جانیوالی منفی پراپیگنڈہ مہم سے جو ابہام پیدا ہوئے وہ اس نشست سے دور ہوگئے؛ شرکاء کی گفتگو

ساجد علی جمعہ 26 ستمبر 2025 14:10

ڈی جی آئی ایس پی آر کا پنجاب یونیورسٹی کا دورہ، طلباء کے سوالات کے جواب ..

لاہور( اُردو پوائنٹ اخبارتازہ ترین۔ 26 ستمبر 2025ء ) ڈی جی آئی ایس پی آر لیفٹیننٹ جنرل احمد شریف چوہدری نے پنجاب یونیورسٹی لاہور کا دورہ کیا جہاں ان کا طلبہ و طالبات، انتظامیہ اور فیکلٹی کی جانب سے پرتپاک استقبال کیا گیا، اس موقع پر انہوں نے طلبہ سے خصوصی نشست میں شرکت کی اور ان کے سوالات کے جوابات دیے۔ سرکاری میڈیا کے مطابق ڈی جی آئی ایس پی آر کی آمد پر یونیورسٹی کا ماحول جوش و جذبے سے بھر گیا، طلبہ و طالبات نے مادرِ وطن کے دفاع میں پاک فوج کے ساتھ کھڑے ہونے کے عزم کا اعادہ کیا، نشست میں نوجوانوں نے نا صرف وطن سے محبت کا اظہار کیا بلکہ بھارت کے خلاف کامیابیوں پر پاک فوج کو خراجِ تحسین بھی پیش کیا۔

بتایا گیا ہے کہ لیفٹیننٹ جنرل احمد شریف چوہدری نے یونیورسٹی کے وائس چانسلر پروفیسر ڈاکٹر محمد اور دیگر فیکلٹی ممبران سے بھی ملاقات کی، ملاقات میں تعلیمی اداروں کے کردار، قومی یکجہتی، اور دفاع وطن جیسے موضوعات زیر بحث آئے، شرکاء نے اس بات پر زور دیا کہ پاک فوج کے خلاف سوشل میڈیا اور دیگر ذرائع سے پھیلائی جانے والی منفی پروپیگنڈا مہمات کے باعث جو ابہام پیدا ہوئے تھے وہ اس نشست سے دور ہو گئے۔

(جاری ہے)

طلباء اور اساتذہ کا کہنا تھا کہ انہیں ڈس انفارمیشن، فیک نیوز اور ہائبرڈ وار فیئر جیسے جدید چیلنجز کے بارے میں مؤثر اور واضح آگاہی حاصل ہوئی ہے، شرکاء نے اس بات پر زور دیا کہ نوجوانوں میں غلط فہمیوں کے تدارک کے لیے اس طرح کے سیشنز نہایت ضروری ہیں تاکہ وہ قوم دشمن عناصر کی سازشوں کو سمجھ سکیں اور ملکی دفاع میں مثبت کردار ادا کریں۔